საქართველოს საპატრიარქოს წარმომადგენლები პრეზიდენტის ადმინისტრაციის მოწვევის მიუხედავად, ავლაბრის სასახლეში მიმდინარე შეხვედრას არ ესწრებიან.

შეხვედრა, რომელიც სხვადასხვა რელიგიური კონფესიების წარმომადგენლებთან მიმდინარეობს, გიორგი მარგველაშვილის ინიციატივით გაიმართა. მისი მიზანია, დაისახოს ერთობლივი მიდგომა ქვეყანაში ქალთა მიმართ გახშირებული ძალადობის ფაქტების პრევენციისათვის.

საქართველოს პრეზიდენტის მრჩევლის, სოფიო შამანიდის განმარტებით, პრეზიდენტს სურს მოუწოდოს სასულიერო ლიდერებს, გამოიყენონ მათი ავტორიტეტი და ქადაგებისას ყურადღება გაამახვილონ ამ უკიდურესად შემაშფოთებელ ტენდენციაზე, რათა მოხდეს ქალთა მიმართ ძალადობის პრევენციის ხელშეწყობა.

„გვინდა ვთხოვოთ სხვადასხვა კონფესიების წარმომადგენლებს, გამოიყენონ ყველა შესაძლებლობა, მოუწოდონ მრევლს, რომ შეწყდეს ძალადობა, განუმარტონ, რომ ქალი და კაცი არიან თანასწორუფლებიანი მოქალაქეები და მსგავსი რამ მიუღებელია ქართული საზოგადოებისა და ყველა რელიგიისთვის“, - განაცხადა პრეზიდენტის მრჩეველმა.

შეხვედრის დასრულების შემდეგ საგანგებო განცხადებას პრეზიდენტი გააკეთებს.