აფრიკის დასახლებაში, ლიანდაგებიდან დიზელით დატვირთული 2 ვაგონი გადაბრუნდა. არსებული ინფორმაციით, შემთხვევა ვაგონებზე თბომავლის შეჯახებამ გამოიწვია.

შემთხვევა გუშინ მოხდა, საგანგებო სიტუაციების სამსახურის განცხადებით, ადგილზე 6 სახანძრო და 2 სამაშველო სამსახურის ბრიგადა მუშაობდა.

"შეტყობინება ავარიის შესახებ 17:25 საათზე შემოვიდა. გადაბრუნდა 2 ვაგონი, რის შემდეგაც დაიღვარა დიზელი. მიმდინარეობს საწვავის ამოტუმბვითი სამუშაოები და მისი ცისტერნებში გადატანა", - განაცხადეს საგანგებო სიტუაციების სამსახურში.

მათივე განმარტებით, შემთხვევას აალება არ მოჰყოლია.