კრწანისის რაიონის გამგებელს, გიორგი კოპალეიშვილს არასამთავრობო ორგანიზაცია სისხლის სამართლის დანაშაულის ჩადენაში ადანაშაულებს.

ორგანიზაცია „მონიტორინგის ცენტრი - მედიატორის“ ხელმძღვანელი, ლევან ხაბეიშვილი ამბობს, რომ კოტე აფხაზის ქუჩაზე გზის სარემონტო-სარეაბილიტაციო სამუშაოები არაკანონიერად მიმდინარეობს, რადგან გამგეობას ტენდერი არ ჩაუტარებია და არა აქვს არც ექსპერტიზის და არც ლაბორატორიის დასკვნები, რის გარეშეც სამუშაოების ჩატარება უკანონო ქმედებაა.

„საკრებულოს რაღაც გაუგებარი თანხმობა აქვს, თურმე, გზის მშენებლობაზე. საკრებულოს თანხმობა არ ნიშნავს საბიუჯეტო სახსრების განკარგვას იურიდიული გადაცდომებით“, - განაცხადა ხაბეიშვილმა.

ბრალდებას უარყოფს თავად გამგებელი. გიორგი კოპალეიშვილი აცხადებს, რომ სამუშაოების დაწყება ფორს-მაჟორით იყო გამოწვეული, რადგან წინ თბილისობაა, კოტე აფხაზის ქუჩა კი დატვირთულია და გზის ამ მდგომარეობაში დატოვება უბედური შემთხვევების რისკს გაზრდიდა.