ცოლს არ მოვკლავდი, მაგრამ ღალატს არ ვაპატიებდი - სოფელ ლამბალოში მომხდარი ტრაგედიის დეტალები

საზოგადოება - 12:50, 17 Oct, 2014

3642

აჯი გასანოვის აცხადებს, რომ მან თავის ცოლთან 14 წელი ბედნიერად იცხოვრა.

„ჩხუბი არ გვქონია, გემრიელად ვცხოვრობით. ახლა ოჯახი დამენგრა. ბიძაშვილები მეუბნებიან, სხვა ბიჭთან ვნახეთ და ამიტომ ვცემეთო. თურმე, სიკვდილის წინ ბავშვების ნახვას ითხოვდა, მაგრამ ბავშვები ჩემს ძმასთან იყვნენ, არავინ მოუყვანა. ძალიან უვლიდა თავის შვილებს. ჯერ კიდევ არ იციან, დედა ცოცხალი რომ არ არის. სულ მეკითხებიან, - დედა სად არისო? - ცუდად არის, საავადმყოფოშია - მეთქი. უფროსმა მითხრა, წამიყვანე საავადმყოფოშიო. ბავშვებს გარდაცვლილი დედა არ ვანახე, არ მინდოდა, ასე დამახსოვრებოდათ. არ ვიცი, მათ როგორ ვუთხრა, რომ დედა არა ჰყავთ. პატარა ხშირად ეძებს დედას. ჩემს ცოლს სიკვდილამდე დედისთვის უთქვამს, - მრცხვენია, ასე ვერ ვიცხოვრებო და ამიტომ მოიკლა თავი. მე ძალიან გამიჭირდება ჩემი შვილების მოვლა. ბავშვებს დედა უნდათ, პატარა ყველასთან არ მიდის, ჯიუტობს, დედას ეძებს. ისინი ხანუმას დედასთან გაიზრდებიან. რა აზრი აქვს აწი ჩემს ცხოვრებას? მე აწი არც მინდორში წავალ, ვერ ვიმუშავებ. ცხვარსა და საქონელს გავყიდი ალბათ და ბაქოში წავალ ან რუსეთში. სახლში ვერ ვჩერდები. მთელი დღეები ხანუმას მშობლების სახლში ვარ. დასაძინებლად ჩემს ძმასთან მივდივარ. სულ მარტო დავრჩი, აწი როგორ ვიცხოვრო? ამის ღირსი არ იყო ჩემი ცოლი. ძალიან მრცხვენია ამ ამბის შემდეგ სოფელში გავლა. არა მგონია, მას ჩემთვის ეღალატა. თუ ეს მართალი იყო, მე მივხედავდი ამას. ცოლს არ მოვკლავდი, მაგრამ ღალატს არ ვაპატიებდი, სახლიდან გავაგდებდი“, - განაცხადა გასანოვმა „გზასთან“ საუბრისას.

17 სექტემბერს ხანუმ ჯეირანოვა საჯაროდ სცემეს, რის შემდეგაც მან სიცოცხლე თვითმკვლელობით დაასრულა.
წყარო: ჟურნალი "გზა"