მთავრობის ეფექტური საქმიანობა ნიშნავს არსებული რესურსების ათვისების ხარისხს. რაც მეტია რესურსი, მთავრობას მეტი შანსი ეძლევა გახდეს წარმატებული. ამ თვალსაზრისით, რესურსების გენერირება არის ერთ-ერთი უმთავარი ამოცანა, რაც კი შეიძლება მთავრობას გააჩნდეს. მთავრობის წარმატების ინდექსის კვლევა, რომელსაც „აიფიემ კვლევები“ ატარებს, უჩვენებს მთავრობის მიმდინარე მუშაობის ეფექტურობას (საქმიანობის ეფექტურობის ინდექსი), მომავალში ამ მუშაობის შედეგად მისაღები შედეგების აღქმის/აღიარების ხარისხს მოსახლეობაში (მომავლის წარმატების ინდექსი) და ამ ორი ინდექსური სისტემის ბაზაზე გამოთვლილ მთავრობის რეიტინგს ცალ-ცალკე სხვადასხვა საქმიანობებისათვის.

გარდა იდეოლოგიური, ფულადი, ნაციონალური (მაგალითად წიაღისეული) და საკომუნიკაციო რესურსებისა, არსებობს რესურსებში მთავარი - ადამიანური რესურსი. ეს რესურსი რამდენიმე მდგენელზეა აგებული, მათ შორის კომპეტენციის, შრომის უნარიანობის და მომავალში წარმატების რწმენის მდგენელზე. ეს უკანასკნელი, ისედაც უკიდურესად მწირი ადამიანური რესურსის ფონზე, ქვეყანაში კატასტროფული სისწრაფით ვარდება.

მთავრობის მიმდინარე საქმიანობის ეფექტურობის, ისევე როგორც წარმატების მოლოდინისა და მთავრობის საქმიანობის რეიტინგის პარამეტრები, სექტემბრის თვეში, რეგრესს განიცდის. რამდენიმე პუნქტით შემცირდა ჯანდაცვის, საგარეო ურთიერთობების, ასევე პოლიციისა და ადამიანის უფლებების საქმიანობის მიმართულებები. მხოლოდ ერთი მიმართულების, ტერიტორიული მთლიანობისა და ჯარის თემა გაიზარდა რამდენიმე პუნქტით. დასაქმების ინდექსი რეკორდულ დაბალ ნიშნულს - მინუს 55%-ს აღწევს. მაქსიმალურ მნიშვნელობას მიმდინარე საქმიანობის ეფექტურობის ინდექსი, განათლებისა და მეცნიერების საქმიანობაში,იღებს და მხოლოდ 12%-ს შეადგენს. ყველაზე დიდი ვარდნა პოლიციის საქმიანობას აქვს (18 პუნქტი), აგრეთვე ადამიანის უფლებების დაცვის მიმართულებას (16 პუნქტი).

წარმატების მოლოდინის შემთხვევაში ვითარება რთულია, რადგან უკლებლივ ყველა საქმიანობა, ერთი თვის განმავლობაში, მინიმუმ 10 პუნქტით ეცემა. დასაქმების მოლოდინის ინდექსი ნულს უტოლდება. მაქსიმალურ მნიშვნელობას ჯანდაცვის მიმართულება იღებს - 20%. მკითხველს შევახსენებთ, რომ განსხვავებით მთავრობის საქმიანობის ეფექტურობის ინდექსისა, წარმატების მოლოდინის ინდექსი ზომავს მთავრობის მიერ ჩატარებული სამუშაოების ეფექტს მომავალში, 3 წლის პერსპექტივით. ვითარება ამ თვალსაზრისით ძალზედ რთულია, რადგან საშუალოდ 7%-იანი წარმატების მოლოდინის ინდექსი ნიშნავს, რომ ქვეყანაში მოქალაქეები ნაკლებად არიან მოტივირებულნიგანახორციელონ საკუთარი რესურსების, მათ შორის დროითი და ფულადი რესურსების ინვესტირება მომავალში. ეს ყველაზე ნეგატიური შეფასებაა, რომელიც ბოლო პერიოდში ემპირიულ კვლევებში დაფიქსირდა.

საბოლოო ჯამში, სექტემბერში, მაღლა მოცემული ორი ინდექსის ბაზაზე გამოთვლილი მთავრობის საქმიანობის რეიტინგი ასევე დაეცა რამდენიმე პუნქტით, მათშორის პოლიციის რეიტინგი 11%-ით, ადამიანის უფლებები 10%-ით და მთავრობის დამოკიდებულების რეიტინგი ხალხისადმი 8%-ით.