რას ედავება „ადამიანი კანონი თავისუფლება“ ლევან გახელაძეს და ხათუნა ბერძენიშვილს

საზოგადოება - 16:05, 11 Oct, 2014

1931

ორგანიზაცია „ადამიანი, კანონი, თავისუფლება“ საზოგადოებრივი მაუწყებლის სამეურვეო საბჭოს ყოფილ თავმჯდომარეს ლევან გახელაძეს და საინფორმაციო სამსახურის ყოფილ უფროსს, ხათუნა ბერძენიშვილს პოლიტიკურ ტენდენციურობაში ადანაშაულებენ.

როგორც ორგანიზაციის თავმჯდომარემ, გიორგი ჭულუხაძემ დღეს გამართულ პრესკონფერენციაზე განაცხადა სამეურვეო საბჭოს ყოფილი თავმჯდომარე, ლევან გახელაძე თავის ინტერვიუებში ყოველთვის მიუთითებდა, რომ საზოგადოებრივი მაუწყებელი იყო ყველაზე დაბალანსებული ტელევიზია, რასაც მოწმობდა საერთაშორისო ორგანიზაციების მონიტორინგის შედეგები.

„აღსანიშნავია, რომ აქ საუბარია გაეროს მიერ დაფინანსებულ პროექტზე, რომელიც წინასაარჩევნოდ სატელევიზიო არხების საინფრომაციო მიუკერძოებლობის ხარისხის მონიტორინგს ახორციელებდა და ამ მონიტორინგის შემსრულებელი იყო „კავკასიის კვლევითი რესურსების ცენტრი“ (CRRC). ეს ის ორგანიზაცია, რომელიც NDI საქართველოსთვის ატარებდა და ატარებს საზოგადოებრივი აზრის კვლევებს და რომელიც „ნაციონალური მოძრაობის“ დროს ლევან თარხნიშვილი ხელმძღვანელობდა.

საზოგადოებაში NDI საქართველოს მიერ ჩატარებული კვლევების სანდოობა ძალიან დაბალია და მისი დაბალი სანდოობა პირდაპირ უკავშირდება CRRC-ს, როგორც შემსრულებელ ორგანიზაციას, შესაბამისად მის მიერ ჩატარებული სატელევიზიო არხების დამოუკიდებლობის მტკიცებაც არადამაჯერებელია“ - განაცხადა გიორგი ჭულუხაძემ.

გიორგი ჭულუხაძის თქმით, ამ პოზიციას ამყარებს ის გარემოებაც, რომ დღეს ლევან გახელაძე და ქალბატონი ხათუნა ბერძენიშვილი ერთი ორგანიზაციის, „სამართლის თაობის“ წევრები არიან, რომელშიც ასევე გაწევრიანებულია „თავისუფალი ზონის“ წევრიც. ორგანიზაცია პოლიტიკური ტენდენციურობის მიზეზად ასახელებს იმ ფაქტს, რომ ხათუნა ბერძენიშვილი რამდენჯერმე თბილისის მერიასთან ,,თავისუფალი ზონის“ მიერ გამართულ აქციაზე შეამჩნიეს.

„გამომდინარე იქედან, რომ ქალბატონი ხათუნა ბერძენიშნვილი, ბატონები ლევან გახელაძე და ლევან თარხნიშვილი დღეს გაცხადებულად წარმოადგენენ „ნაციონალურ მოძრაობას“ ადასტურებს იმას, რომ საზოგადოებრივი მაუწყებლის მიუკერძოებლობაზე საუბარი თავის დროზე იყო იმ სქემის ნაწილი, რომლითაც მოქმედებდა მთელი სისტემა“ - აღნიშნა გიორგი ჭულუხაძემ.