საინიციატივო ჯგუფის წევრი ბექა ცხადაძე მართმადიდებელი ეკლესიის დაფინანსებასთან დაკავშრებით განცხადებას ავრცელებს. როგორც განცხადებაშია ნათქვამი, სექსუალურ და რელიგიურ უმცირესობათა დამცველმა არასამთავრობო ორგანიზაციებმა კონფერენცია გამართეს, რომელზეც განხილულ იქნა მართლმადიდებელი ეკლესიის დაფინანსების საკითხი:

„რამდენიმე დღის წინ მართლმადიდებელი ეკლესია კვლავ ანტიეკლესიურად განწყობილი არასამთავრობო ორგანიზაციების სამიზნე გახდა. სექსუალურ და რელიგიურ უმცირესობათა დამცველმა არასამთავრობო ორგანიზაციებმა კონფერენცია გამართეს, რომელზეც განხილულ იქნა მართლმადიდებელი ეკლესიის დაფინანსების საკითხი. მათი განცხადებით საქართველოს მართლმადიდებელი ეკლესია ყოველწლიურად სახელმწიფო ბიუჯეტიდან 29 მილიონ ლარს იღებს, რაც სიმართლეს არ შეესაბამება, აღნიშნული მაჩვენებლი არ აღემატება 25 მილიონ ლარს.

ევროკავშირის წევრ სახელმწიფოებში სახელმწიფო ბიუჯეტიდან რელიგიურ ორგანიზაციათა დაფინანსების ოდენობა საგადასახადო შემოსავლების 0.8%-დან 2.3%-მდე მერყეობს. ჩვენ საანგარიშოდ 1% ავიღოთ.

2002 წლის აღწერის თანახმად, მართლმადიდებელი მრევლი საქართველოს მოსახლეობის 83.9%-ს შეადგენს. მართალია, წელს, ნოემბრის თვეში მორიგი აღწერა ჩატარდება , მაგრამ, სავარაუდოა, რომ კონფესიური შემადგენლობა არსებითად არ შეიცვლება.

საქართველოს 2014 წლის „სახელმწიფო ბიუჯეტის შესახებ საქართველოს კანონის“ მე-4 მუხლის თანახმად, მიმდინარე წელს მხოლოდ საშემოსავლო გადასახადის გზის სახელმწიფო ბიუჯეტში ჩარიცხული თანხა 1.77 მილიარდ ლარს შეადგენს. საიდანაც, მართლმადიდებელი მრევლის მიერ ჩარიცხული თანხა 1.485 მილიარდ ლარს შეადგენს.

საქართველოში რელიგიურ ორგანიზაციათა დაფინანსების მიმართულებით, ევროპული სტანდარტების დამკვიდრების შემთხვევაში, მართლმადიდებელი ეკლესია ნაცვლად 25 მილიონისა, ყოველწლიურად მინიმუმ 75 მილიონ ლარს მიიღებს.

საქართველოს მართლმადიდებელი ეკლესია აცნობიერებს სახელმწიფოს ეკონომიკურ სიდუხჭირეს და არ ითხოვს ბიუჯეტიდან იმ ოდენობის რესურსების გამოყოფას, რაც ევროსტანდარტებით ეკუთვნის.

მივმართავ ანტიეკლესიურად განწყობილ უფლებადამცველებს - მოსვენებას არ გაძლევთ მართლმადიდებელი ეკლესიის 25 მილიონი ლარით დაფინანსების საკითხი? - აღნიშნულ მაჩვენებლს 75 მილიონ ლარამდე გავზრდით!“, - ნათქვამია განცხადებაში.