საფეხბურთო კლუბ გორის „დილას“ დაშლის საფრთხე აღარ არსებობს. ამის შესახებ გორის „დილას“ სტადიონის საკონფერენციო დარბაზში გამართულ ბრიფინგზე გახდა ცნობილი.

გუნდის მთავარმა მწვრთნელმა, უჩა სოსიაშვილმა ფეხბურთელებთან ერთად ადგილობრივ ხელისუფლებასთან შეხვედრის დეტალებზე ისაუბრა. სოსიაშვილის თქმით, ისინი გორის მერსა და შიდა ქართლის გუბერნატორს შეხვდნენ. რომლებსაც გუნდში შექმნილი ფინანსური პრობლემების შესახებ დეტალური ინფორმაცია მიაწოდეს. მათ მიიღეს პირობა, რომ უახლოეს დღეებში კლუბი ორი თვის სახელფასო დავალიანებას მიიღებს.

გორის „დილამ“ გუშინ საკუთარ ვებ-გვერდზე განცხადება გაავრცელა, სადაც აღნიშნული იყო, რომ გუნდი საწვრთნელ ვარჯიშებს წყვეტდა ფინანსური კრიზისის გამო. მათ სამი თვის ხელფასი არ აუღიათ.

მოლაპარაკებების შემდეგ კი დღეს საწვრთნელი ვარჯიშები განაახლეს.

გიორგი ახალკაცი გორი სპეციალურად „ნიუპოსტისთვის“