"ფორმულა კრეატივი" თურქული სერიალის გადმოქართულებას გეგმავს

საზოგადოება - 18:15, 07 Oct, 2014

2784

"ფორმულა კრეატივმა" თურქული სერიალი „მწარე ცხოვრება“ იყიდა და მის გადმოქართულებას გეგმავს. როგორც პროდიუსერი მიშა მშვილდაძე ამბობს, ამ სერიალზე არჩევანი მისი სიუჟეტის გამო გაკეთდა. ახლა ფინანსური რესურსების მობილიზების და დაგეგმვის ეტაპია. პავილიონებზე მუშაობენ. სერიალის ნაწილი ნათარგმნია. ჩატარებულია პირველადი კასტინგი, შეიქმნა მსახიობთა ბაზა. მოიხმობენ რეგიონალური თეატრების მსახიობებსაც. გადაღებებს შემდეგი წლიდან იწყებენ.
მიშა მშვილდაძე: „აქ მოთხრობილი ამბის გმირებს რა წინააღმდეგობაც ხვდებათ, ქართულ რეალობას კარგად ერგება. არჩევანიც ამიტომ გავაკეთეთ მასზე.
– გათვლა რაზე გაკეთდა?
– ცხოვრებისეული სერიალია, რომელიც ეთერში ყოველდღიურად გავა. მას მაყურებელი ეყოლება. სერიალი სიყვარულზე და იმ წინააღმდეგობაზეა, რაც სიყვარულს ახლავს თან. ასევე არის სიმდიდრეზე, სიღარიბეზე, პატიოსნებაზე, წარმატების მიღწევის სხვადასხვა გზებზე და ამ გზებზე წარმოქმნილ პრობლემებზე, სამართალზე და ასე შემდეგ. ჩვენ სიუჟეტურ ხაზს ავიღებთ და დავწერთ ორიგინალურ სცენარს.
– სცენარს ვინ დაწერს?
– ამ ეტაპზე სცენარისტად ქეთი ორაგველიძე მოიაზრება. პირველად თანამშრომლობს ჩვენთან.

წყარო http://primetimenews.ge/