„მოქალაქის“ პროექტებში მონაწილეობის მსურველთა რეგისტრაცია დღეიდან იწყება.

საზოგადოება - 10:08, 07 Oct, 2014

2554

„მოქალაქემ“ ორი პროექტის – „სამოქალაქო განათლების ოლიმპიადა“ და „სტუდენტები თვითმმართველობისათვის“ პრეზენტაცია გუშინ გამართა. "სამოქალაქო განათლების ოლიმპიადა" მოსწავლეებში სამოქალაქო ღირებულებების დამკვიდრების ხელშეწყობას ისახავს მიზნად. პროექტით განსაზღვრულია ნიჭიერი, მაღალი მოქალაქეობრივი კომპეტენციისა და სოციალურად აქტიური მოსწავლეების გამოვლენა და მხარდამჭერა, ინფორმირებული აქტიური და პასუხისმგებლობის გრძნობის მქონე მოქალაქეების აღზრდის ხელშეწყობა. სამოქალაქო განათლების ოლიმპიადაში მონაწილეობის მიღება შეუძლიათ საქართველოს სკოლების IX-XII კლასების მოსწავლეებს. ოლიმპიადა ჩატარდება ქართულ, რუსულ, სომხურ და აზერბაიჯანულ ენებზე, რეგისტრაცია დღეს დაიწყება 7 ოქტომბერს და 31 ოქტომბრის ჩათვლით გაგრძელდება.

მონაწილეობის მსურველებმა რეგისტრაციის გასავლელად სკოლის ადმინისტრაციას უნდა მიმართონ. პროექტის ფარგლებში მომზადდა ვიდეოლექციების კურსი „სამაგალითო ადამიანები“. ლექციების მიზანია ახალგაზრდებს გააცნოს საზოგადოებისათვის ნაკლებად ცნობილი ადამიანების ისტორიები, რომელთა ცხოვრებაც სხვადასხვა ეპოქაში მოქალაქეობრივი ცნობიერებისა და ღირებულებების უპირობო დაცვისა და თავგანწირვის მაგალითებს წარმოადგენს. სხვა პრიზებთან ერთად, გამარჯვებულები გაემგზავრებიან უცხო ენის შემსწავლელ კურსებზე დასავლეთ ევროპის ქვეყნებში.

რაც შეეხება მეორე პროექტს, რომელსაც ჰქვია „სტუდენტები თვითმმართველობისათვის“, მისი მიზანია, ახალგაზრდების ჩართვა სამოქალაქო საზოგადოების განვითარების პროცესში, ადგილობრივი დემოკრატიის გაძლიერება, თვითმმართველობის იდეის პოპულარიზაცია ახალგაზრდებში. ასევე, მისი მიზანია თვითმმართველობის ახალგაზრდა პროფესიონალების მომზადებისა და ჩართულობის ხელშეწყობით ადგილობრივი თვითმმართველობის განვითარების მხარდაჭერა. აღნიშნულ კონკურსში მონაწილეობის მიღება შეუძლიათ სტუდენტურ გუნდებს. მსურველები რეგისტრაციას დღეიდან ერთი თვის განმავლობაში, ელექტრონულად გაივლიან. სხვა პრიზებთან ერთად აქ გამარჯვებული გუნდის წევრებისთვის მოეწყობა სასწავლო შემეცნებითი ტური განვითარებული თვითმმართველობის მქონე ევროპის ქვეყნებში.