"ჩემი ნახევარძმა დედაჩემის ყოფილი შეყვარებული აღმოჩნდა"-სიყვარულის უცნაური ისტორია

საზოგადოება - 14:10, 04 Oct, 2014

19653

”სულ რამდენიმე თვეა, რაც დედაჩემის საიდუმლო გავიგე და მას შემდეგ თავზარდაცემული დავდივარ. ამბავმა, რომელიც მოვისმინე, შემზარა. ვერასოდეს წარმოვიდგენდი, ჩემი მშობლების უკან ამხელა ისტორია თუ იმალებოდა.
მე გათხოვილი ვარ, ოჯახი სიყვარულით შევქმენი. მომავალი ქმარი სიგიჟემდე მიყვარდა. კარგად ვიცი, ეს გრძნობა ადამიანს თავს აკარგვინებს, მაგრამ უღირსი საქციელის ჩადენის უფლება მაინც არ გაქვს. თავი უნდა მოთოკო და ღირებულებებს არ უნდა გადააბიჯო. ჩემმა მშობლებმა კი თავის დროზე სწორედ ეს ზღვარი ვერ დაიცვეს.
თურმე დედაჩემს ორი წელი უყვარდა ბიჭი, რომელსაც ყველა მის საქმროდ თვლიდა. ამბობენ, რომ ერთმანეთთან დიდი სიყვარული აკავშირებდათ. ერთიმეორის ოჯახებიც გაიცნეს და... მერე დეტალები არ ვიცი, რა როგორ მოხდა, მაგრამ თურმე დედაჩემს და მისი შეყვარებულის მამას ერთმანეთი შეუყვარდათ. დედაჩემი შეყვარებულს დაშორდა. ეს კაცი სიყვარულით ისე გადავიდა ჭკუიდან, რომ შვილის ტოლი გოგოს გამო ცოლი მიატოვა, ოჯახიდან წავიდა. დიდხანს ვერ ხვდებოდნენ, ეს რა მიზეზით მოხდა, მაგრამ სიმართლე მაინც გაირკვა, მიხვდნენ, რომ თავისი შვილის ყოფილ შეყვარებულთან რომანი ჰქონდა გაჩაღებული. მათი ამბავი რომ გამომჟღავნდა, დაქორწინდნენ კიდეც. ასე გავჩნდი მე.
ჩემს მშობლებს მთელმა სანათესაომ ზურგი აქცია, მაგრამ მერე ურთიერთობა თანდათან აღადგინეს, ამაში ალბათ გარკვეული წვლილი იმანაც შეიტანა, რომ მამა საკმაოდ მაღალ თანამდებობებზე მუშაობდა, მდიდარი კაცი იყო და ის ყველას სჭირდებოდა. ყოფილი ცოლი და შვილები, რომლებიც პირველი ქორწინებიდან ჰყავდა, მასზე იყვნენ დამოკიდებული, ამიტომ, უნდოდათ თუ არა, ვერ დაკარგავდნენ და ურთიერთობა ჰქონდათ.
მშობლები მანებივრებდნენ, მამას სიგიჟემდე ვუყვარდი. დედა ქმარზე ძალიან უმცროსი იყო, მაგრამ ისე შეხმატკბილებულები ცხოვრობდნენ, ისე უგებდნენ ერთმანეთს, თითქოს ერთად შეზრდილები ყოფილიყვნენ. ერთმანეთი ძალიან უყვარდათ. მამამ სიცოცხლის ბოლო თვეები ლოგინში გაატარა, ფეხზე ვერ დგებოდა. დედა ბავშვივით უვლიდა, ახლოს არავის აკარებდა. ერთხელ ღამით გამეღვიძა და ოთახში რომ შევიხედე, დედას ზღაპრების წიგნი ეჭირა ხელში და უკითხავდა. მამას ბავშვით ჰქონდა თავი მის მკერდზე მიდებული და პატარა ბიჭივით უსმენდა. ეს სცენა არასოდეს დამავიწყდება.
ჩემი ნახევარი და–ძმა ჩვენთან არ მოდიოდნენ. განსაკუთრებით კი ჩემი ძმა გაგვირბოდა. ეს ჩვეულებრივ ამბად მიმაჩნდა. ვფიქრობდი, რომ ჩემზე ეჭვიანობდნენ. აბა, მაშინ რას წარმოვიდგენდი, რომ ჩემი ნახევარძმა დედაჩემის ყოფილი შეყვარებული იყო. სიმართლე ჩვენმა ნათესავმა მითხრა. რაღაც ამბავს მეუბნებოდა და უნებურად თქვა.
დედასთვის არ მითქვამს, რომ მისი საიდუმლო გავიგე, რადგან მამაჩემის გარდაცვალების შემდეგ ისედაც ნახევარი ქალია, ლამის საფლავში ჩაჰყვეს. არ მინდა, გული ვატკინო, მაგრამ საკუთარ თავს ვატყობ, რომ ადამიანების მიმართ დამოკიდებულება შემეცვალა, თითქოს ყველასი მრცხვენია. მშობლების საქციელს ხან რომელი კუთხიდან ვუყურებ, ხან – რომლიდან, მაგრამ მათ მაინც ვერ ვამართლებ. ”

http://sana.ge/