ბათუმში მეჩეთის მშენებლობის საკითხი 20 ოქტომბრამდე გადაწყდება

საზოგადოება - 13:14, 04 Oct, 2014

1787

აჭარის მთავრობის მეთაურის არჩილ ხაბაძემ მუსლიმებს ყურბან-ბაირამის დღესასწაული მიულოცა, მისი განცხადებით, ბათუმში მეჩეთის მშენებლობისა თუ არსებული სამლოცველოს გაფართოების საკითხი 20 ოქტომბრამდე გადაწყდება. ხაბაძის თქმით, აღნიშნული საკითხის განხილვა მუსლიმური ორგანიზაციების წარმომადგენლებთან ერთად პრემიერ-მინისტრ ირაკლი ღარიბაშვილთან შეხვედრის დროს მოხდება. "ამ ეტაპზე ვფიქრობთ და ვმუშაობთ ვარიანტებზე, 20 ოქტომბრამდე ორგანიზაციების ხელმძღვანელებთან ერთად პრემიერთან გვექნება შეხვედრა. რა მოთხოვნებიც აქვს მუსლიმებს, ჩვენი მთავრობა ითვალისწიმებს, ერთად ვმსჯელობთ, საზოგადოების წინაშე გამოგვაქვს და ეს არის ღია და გამჭვირვალე პროცესი. ამ ქვეყანაში მუსლიმების და ყველა რელიგიის უფლებები იქნება დაცული.ყველა მუსლიმს ვულოცავ ყურბან-ბაირამის წმინდა დღესასწაულს. თითოეული მუსლიმი დღეს განსაკუთრებით ბედნიერია, რადგან ღმერთთან დაახლოებას ცდილობს. მსხვერპლის შეწირვით ისინი ეხმარებიან ყველა გაჭირვებულს, ვისაც ეს სჭირდება. დღევანდელი დღე სიკეთის სიხარულის, ბედნიერების მომტანია", - აღნიშნა არჩილ ხაბაძემ. მსოფლიოს მასშტაბით მუსლიმები დღეს ყურბან-ბაირამის, ანუ მსხვერპლშეწირვის დღესასწაულს აღნიშნავენ. ყურბან-ბაირამის დღესასწაული სამ დღეს გრძელდება.