"საქართველოს ეკონომიკისა და მდგრადი განვითარების სამინისტროს, საქართველოს ინოვაციების და ტექნოლოგიების სააგენტო, სამ საგრანტო პროგრამას იწყებს", - ამის შესახებ ეკონომიკის მინისტრის პირველმა მოადგილემ, დიმიტრი ქუმსიშვილმა განაცხადა.

საგრანტო განაცხადის ფორმის ჩამოტვირთვა 6 ოქტომბრიდან, ნებისმიერ მსურველს შეეძლება. განაცხადის ფორმა საქართველოს ეკონომიკისა და მდგრადი განვითარების სამინისტროს, საქართველოს ინოვაციების და ტექნოლოგიების სააგენტოს ვებ-გვერდზე იქნება განთავსებული. დაინტერესებულ პირებს ასევე შეეძლებათ დამატებითი ინფორმაციის მიღება საგრანტო პროგრამის სტრუქტურის შესახებ.

როგორც დიმიტრი ქუმსიშვილმა განაცხადა, პროგრამები მიმართულია ტექნოლოგიების და ინოვაციების კომერციალიზაციისკენ, ნიჭიერი ადამიანების ხელშეწყობისა და ახალი დამწყები მაღალტექნოლოგიური კომპანიების გაჩენისკენ. ისინი ასევე უზრუნველყოფენ ინოვაციების და ტექნოლოგიების განვითარებისთვის შესაბამისი ინფრასტრუქტურის ჩამოყალიბებას.

საგრანტო პროგრამის ფარგლებში სამრეწველო ინოვაციების 2 ლაბორატორიის ფორმირება მოხდება უნივერსიტეტების ბაზაზე, რომლებიც უახლესი მაღალტექნოლოგიური დანადგარებით აღიჭურვება. უნივერსიტეტები შეირჩევა დამოუკიდებელი საგრანტო საბჭოს მიერ. ასევე უნივერსიტეტების ბაზაზე კერძო ბიზნესთან აქტიური ინტეგრაციის განსახორციელებლად და სამრეწველო ამოცანების შესასრულებლად, პრაქტიკაზე და ბაზარზე ორიენტირებული გამოცდილების მისაღებად ინოვაციების 3 ლაბორატორია შეიქმნება.