საგანგებო შტაბის წევრებმა დამეწყრილი ტერიტორიები მოინახულეს

საზოგადოება - 19:40, 02 Oct, 2014

1364

აჭარის მთავრობის თავმჯდომარის მოვალეობის შემსრულებელმა და სამთავრობო შტაბის ხელმძღვანელმა ნუგზარ სურმანიძემ აჭარის მთავრობის აპარატის უფროსთან რუსლან ქორიძესთან და საავტომობილო გზების დეპარტამენტის თავმჯდომარესთან გიორგი რომანაძესთან ერთად ხელვაჩაურის მუნიციპალიტეტში დამეწყრილი ტერიტორია დაათვალიერა.

საგანგებო შტაბის წევრებმა ხელვაჩუარის მუნიციპალიტეტის სოფელ ჭანივრში ღვარცოფის შედეგად დაზიანებული გზის აღდგენითი სამუშაოები მოინახულეს, აქ სტიქიის შედეგად 5 ოჯახს გადაადგილება შეეზღუდა. მთავრობის წევრბი იმყოფებოდნენ მახოში, სადაც მეწყრის შედეგად დაზიანდა შიდა საავტომობილო გზა. აღნიშნულ მონაკვეთზე მოძრაობა უკვე აღდგენილია. ხელვაჩაურის მუნიციპალიტეტის გამგებლის ნადიმ ვარშანიძის განმარტებით სტიქიის შედეგად დაზიანებული გზების აღდგენა დასასრულს უახლოვდება, პარალელურად მიმდინარეობს ზარალის დათვლა.

ჩამოშლილი მიწის მასებისგან გზების გაწმენდა ამ დროისთვის ქედის მუნიციპალიტეტის 3 სოფელში გეგელიძეებში, კოკოტაურსა და ცხმორისში მიმდინარეობს.

„სტიქიის შემდეგ აღდგენითი სამუშოები დოლოგნიდან დავიწყეთ, დღეს უკვე ერთდროულად სამ სოფელში მიმდინარეობს. ქედაში სტიქიის შედეგად მოყენებული ზარალის რაოდენობა 100 000 ლარის ფარგლებში მერყეობს. ჩვენ ასევე დავითვალეთ დოლოგანში 5 ოჯახისთვის მიყენებული ზიანი, სადაც სტიქიამ ადგილობრივებს კარტოფილისა და სიმინდის ნარგავები გაუნადგურა, დაზარალებული ოჯახები თანხას უახლოეს დღეებში მიიღებენ“–აღნიშნა ქედის მუნიციპალიტეტის გამგებელმა დავით დუმბაძემ.