განათლების სამინისტრო მზად არის, მიმართვის შემთხვევაში, დაზარალებული აუტისტი ბავშვის ოჯახს დაეხმაროს და დააკვალიანოს. ამის შესახებ „ნიუპოსტს“, სამინისტროს პრესსამსახურში, სკოლა „სადუნში“ მომხდარ ინციდენტზე კომენტირებისას განუცხადეს.

მათივე განმარტებით, აღნიშნული სკოლა-ბაღი კერძო საკუთრებაა და აღნიშნული საკითხი მათ არ ეხებათ, თუმცა ოჯახის დასახმარებლად მზად არიან.

„ჩვენ აუტისტური სპექტრის ბავშვებისათვის, სკოლებში დავნერგეთ განათლების მიღების სოციალიზაციის დამატებითი საშუალებები. მუდმივად ვმუშაობთ მშობლებთან და მასწავლებლებთან, რათა მოხდეს ბავშვების ინტეგრაცია, გადაილახოს არსებული სტიგმა და ყველა მოსწავლეს მიეცეს საშუალება ჰქონდეს სრულფასოვანი ბედნიერი ბავშვობა. კონკრეტულად ამ ფაქტს რაც შეეხება, ეს ფაქტი მოხდა კერძო სკოლის ბაღში, ამიტომ ჩვენ ეს პირდაპირ არ გვეხება და ამ შემთხვევაში კონპეტენციის სფეროებზე საუბარი უადგილოა, რადგან ბავშვის უფლებების დარღვევას ეხება საქმე. უნდა გამოქვეყნდეს ექსპერტიზის დასკვნა და გაირკვეს, რა მოხდა და რა ნაბიჯები შეიძლება გადაიდგას შემდგომ. ჩვენ მზად ვიყავით რეკომენდაცია გაგვეწია ოჯახისთვის და მომართვის შემთხვევაში დავხმარებოდით და დაგვეკვალიანებინა ისინი“, - აცხადებენ სამინისტროში.

4 წლის გაბრიელ ნიშნიანიძეს დაზიანებები 26 სექტემბერს აქვს მიყენებული. აღნიშნულთან დაკავშირებით ორი ვერსია ვრცელდება. ბავშვის მშობლები მიიჩნევენ, რომ 4 წლის გაბრიელს დაზიანებები ბაღის მასწავლებელმა მიაყენა. „სადუნის“ დირექცია აღნიშნულს უარყოფს. მათი ინფორმაციით, ბავშვმა დაზიანება თანატოლთან ჩხუბის დროს მიიღო.