,,ვწუხვართ თუ დანაშაულის დაფარვის პოზიციას ეკლესიაც იზიარებს“ - დემოკრატიული განვითარების ეროვნული ცენტრი

საზოგადოება - 20:09, 28 Sep, 2014

1516

დემოკრატიული განვითარების ეროვნული ცენტრი, დღეს საკბირაო ქადაგებისას საქართველოს პატრიარქის პოზიციას ეხმაურება, რომელიც თანახმადაც, უწმინდესმა მედიასა და ხელისუფლებას მოუწოდა, ნაკლებად მოხდეს კრიმინალის გაშუქება, რადგან, როგორც უწმინდესმა აღნიშნა, მისი ტირაჟირება საზოგადოების სტრესს იწყვევს.

,,ვწუხვართ თუ დანაშაულის დაფარვის პოზიციას ეკლესიაც იზიარებს, რადგან ქვეყანაში მიმდინარე მოვლენები, მიუხედავად იმისა თუ როგორ ხასიათს ატარებენ ისინი პოზიტიურს თუ ნეგატიურს, უნდა იყოს საზოგადოებისთვის ცნობილი. ჩვენს საზოგადოებას, დღეს როგორც არასდროს, ესაჭიროება სისტემის გამჭირვალობა და სახელმწიფოში არსებული მდგომარეობის შესახებ ინფორმაციაზე ხელმისაწვდომობა, რადგან სწორედ ინფორმირებული და მობილიზებული საზოგადოებაა დემოკრატიის გარანტი. ჩვენ არ ვფიქრობთ, რომ დანაშაულის შესახებ ინფორმაციის საჯაროობა მის პოპულარიზაციას უწყობს ხელს, პირიქით ეს ერთ-ერთი მექანიზმია იმისათვის, რომ კომპეტენტურმა სახელმწიფო ორგანოებმა ვითარების შესაბამისად იმოქმედონ.

ვიმედოვნებთ, რომ დანაშაულის დაფარვას ქვეყანაში არცერთი კონფესია არ უჭერს მხარს და ყველა მომხრეა იმისა რომ დანაშაულის რაოდენობა მინიმუმამდე იქნეს დაყვანილი. სწორედ ამას ემსახურება მედია და მისი ფუნქციაც ქვეყანაში არსებული მდგომარეობის შესახებ, ხელისუფლებისა და საზოგადოების ინფორმირებაა. ჩვენ არ ვფიქრობთ, რომ საზოგადოება ირეალურ გარემოში უნდა ვამყოფოთ, პირიქით ის მუდამ უნდა იყოს ინფორმირებული და აქტიური, რომ იქონიოს გავლენა ხელისუფლებაზე და ჰქონდეს მაღალი სტანდარტების შესაბამისი მოთხოვნები ხელისუფლების მიმართ. მიგვაჩნია რომ სწორედ მედიის თავისუფლება და აქტიური მუშაობაა გზა დემოკრატიისა და მშვიდობისაკენ რაც ჩვენი საზოგადოების არჩევანია“, - ნათქვამია ორგანიზაციის განცხადებაში.