პუშკინის ქუჩაზე ესტაკადის მშენებლობის პროექტზე კონკურსი გამოცხადდება და არჩევანი საუკეთესოზე შეჩერდება, - ამის შესახებ განცხადება თბილისის მერმა, დავით ნარმანიამ დღეს გააკეთა. მისი განმარტებით, ესტაკადა ძველი ქალაქის იერსახესთან და ისტორიული მემკვიდრეობის ნაწილთან შესაბამისობაში იქნება.

“ჩვენ ამ საკითხის განხილვა გვქონდა ექსპერტებთან სატრანსპორტო სფეროში და კულტურული მემკვიდრეობის დაცვის სპეციალისტებთან. მას შემდეგ, რაც ჩვენმა წინამორბედებმა ძველი თბილისის გალავნის ნაშთებს ე.წ. რეაბილიტაციის პროცესში ბეტონი დაასხეს, მან ისტორიული მემკვიდრეობის სტატუსი დაკარგა. ესტაკადა გაკეთდება ისეთი ფორმით, რომ ეს ადგილი ტურისტებისთვის იქნება თავისუფლად ხელმისაწვდომი, გაკეთდება განათება და არანაირი დისკომფორტი ტურისტებს არ შეექმნებათ. ამასთან, პროექტი ისე განხორციელდება, რომ ის, ერთი მხრივ, ისტორიული მემკვიდრეობის ნაწილთან შესაბამისობაში მოვა, მეორე მხრივ კი, განიტვირთება ამ ტერიტორიაზე წარმოქმნილი საცობები და დისკომფორტი მოეხსნება მოსახლეობას და მძღოლებს”, - განაცხადა დავით ნარმანიამ.

გარდა ამისა, თბილისის მერმა აღნიშნა, რომ პუშკინის ქუჩაზე ესტაკადის მოწყობის პროექტი “პანორამა თბილისთან“ კავშირში არ არის. მისი თქმით, ამ ქუჩაზე ორმხრივი მოძრაობის შეზღუდვამ საცობები გამოიწვია, რამაც, თავის მხრივ, საფრთხე მიმდებარე ვიწრო ქუჩებზე არსებულ ისტორიულ ნაგებობებს შეუქმნა.