,,ხარისხი ფასიც ღირს...“ - უცნობი საკუთარი შოუს ბილეთის ფასზე

კულტურა - 18:57, 26 Sep, 2014

6007

უცნობის სპექტაკლზე დასასწრები ბილეთების ღირებულებასთან დაკავშირებით სოციალურ ქსელში დიდი უკმაყოფილება გამოითქვა. გავრცელებული ინფორმაციით, ბილეთის ფასი 50-დან 150 ლარამდე იყო.

სპექტაკლის დასრულების შემდეგ საზოგადოების უკმაყოფილება უკომენტაროდ არ დაუტოვებია თავად გია გაჩეჩილაძეს. უცნობმა კომენტარი ეკა ხოფერიასთა გააკეთა:

„150-იანი ბილეთი არ არსებობდა, მაქსიმალური ფასი 100 ლარი იყო... მაგრამ, ეს ახალი ტექნოლოგიების შოუ იმდენად ძვირადღირებული სიამოვნებაა და ძვირადღირებული პროექტია, რომ სხვანაირად არც შეიძლებოდა.

რომ ვიანგარიშეთ და გამოვითვალეთ ისეთი ნიუანსები იყო, რომელიც ვალს გვიტოვებდა და ა. შ... არ მინდა ახლა ამაზე საუბარი. ნებისმიერ ქვეყანაში, სადაც არ უნდა მიხვიდეთ ასეთი ტექნოლოგიების შოუს ვერ დაესწრებით 500-600 დოლარი რომ არ გადაიხადოთ... შესაბამისად ხარისხი ფასიც ღირს...

მაგრამ მე ვპირდები მაყურებელს, როდესაც ეს რუსთაველის თეატრის რეპერტუარში ჩაჯდება, შეძლებისდაგვარად გაიაფდება ბილეთის ფასი და აბსოლუტურად ყველას შეეძლება ამის ნახვა. მე თვითონაც ძალიან მინდა ბევრმა ადამიანმა ნახოს ეს პროექტი და ეს აუცილებლად ასე იქნება“, - განაცხადა გია გაჩეჩილაძემ.

„უცნობის“ კონცერტზე დასასწრები ბილეთების მაღალ ფასთან დაკავშირებით უკმაყოფილებას გამოთქვამდა ჟურნალისტი ინგა გრიგოლია.

"საბოლოოდ მივხვდი, "იუმორინას" და "კომედი ჯგუფის" კონცერტების გარდა, თითქმის რატომ არ დადის ხალხი ასე მასობრივად არც ერთ კონცერტზე. მინდოდა, ჩემი მეგობრებისთვის საჩუქარი გამეკეთებინა და გადავწყვიტე, უცნობის კონცერტის ექვსი ბილეთი მეყიდა. ნუ, ფასები დამხვდა ისეთი, აღარ ვიყიდე. ყველაზე ცუდი ადგილები 50 ლარიდან იწყებოდა. საშუალო ფასი - 100 ლარი იყო და ზევითაც. ხოდა დაადეთ ეს ფასები ამ გაჭირვებულ ქვეყანაში ბილეთებს და მერე ნუღა იწუწუნებთ. რატომ არ დადის ხალხი კონცერტებზე.... შეგრჩებათ ე.წ "სვეტსკურ-ელიტური" მაყურებელი და ხალხისგან ისევე შორს იქნებით, როგორც ცა და დედამიწა", - წერდა გრიგოლია "ფეისბუქზე".