საზოგადოება „ივერია“ 27 სექტემბერს დაგეგმილ ,,აფხაზთა კრებას“ უერთდება

საზოგადოება - 11:05, 26 Sep, 2014

2059

,,მიგვაჩნია, რომ აგრესორი და ოკუპანტი სახელმწიფოს მიერ ხდებოდა სიტყვა „აფხაზის“ მიზანმიმართულად მცდარი გამოყენება, რაც ხელს უწყობდა აფხაზეთის რეგიონში მცხოვრებ ხალხებს შორის კონფრონტაციის და შუღლის გაღვივებას. აფხაზი აღნიშნავს საქართველოს ერთ კონკრეტულ რეგიონში მაცხოვრებელ მოსახლეობას და არა რომელიმე ეთნიკურ ჯგუფს. აფხაზეთიდან დევნილია ეთნიკურად ქართველიც, აფხაზიც, უკრაინელიც, ბერძენიც, ებრაელიც და ყველა ის ადამიანი, ვინც რუსეთის მიერ ღია სამხედრო ინტერვენციამდე მუდმივად სახლობდა საქართველოს ამ კუთხეში. სწორედ ამიტომ, მივესალმებით აფხაზთა კრების, როგორც ოკუპირებული საქართველოს ტერიტორიიდან იძულებით გადაადგილებული ადამიანების კრების მოწვევას.

საზოგადოება „ივერიას“ ასევე დაუშვებლად მიაჩნია, რომ დევნილობაში მყოფი აფხაზეთის უზენაესი საბჭოს არჩევნები არ გამართულა თითქმის 25 წელია და დღეს დეპუტატის მანდატები აქვთ იმ პირებს, რომლებსაც საქართველოს წინა მოწვევის პარლამენტის მიერ მიღებული „თავისუფლების აქტის“ შესაბამისად, ეკრძალებათ მაღალი სახელმწიფო თანამდებობის დაკავება. ტრაგიკული და სასაცილოა, რომ დევნილობაში მყოფი მთავრობის თავმჯდომარის პოსტი უკავია სსრკ-ს კომუნისტური პარტიის ფუნქციონერს და ღიად პრო-რუსული და ანტი-დასავლური პარტიის ერთ-ერთ დამფუძნებელს. აღნიშნული ორგანო ხშირად არამიზნობრივად და გაუმჭვირვალედ ხარჯავს იმ თანხებს, რომელიც მას ბიუჯეტით განესაზღვრება და რომელიც დევნილი მოსახლეობისთვის არის განკუთვნილი. მიგვაჩნია, რომ ეს ასე აღარ უნდა გაგრძელდეს და მივესალმებით საზოგადოება „დაბრუნების“ ინიციატივას, კომპლექსურად დადგეს ავტონომიური რესპუბლიკის უზენაესი საბჭოს გადარჩევის და აფხაზეთის მთავრობის ანგარიშვალდებულების საკითხი.

27 სექტემბერი სოხუმის დაცემის დღეა. ამ დღეს საზოგადოება „ივერია“ გაიხსენებს რუსეთთან ომში დაღუპულ მეომრებს და მოქალაქეებს“, - ნათქვამია ,,ივერიის“ განცხადებაში.