კორუფციული გარიგების გამო დაკავებული მსაჯის, ზვიად ასკაროღლის მამა მიიჩნევს, რომ საქართველოს ფეხბურთის ფედერაციის სამსაჯო კომიტეტმა მის შვილს მსაჯობის უფლება სამართლიანად წაართვა.

გურამ ასკაროღლი, რომელიც წარსულში „ფიფას“ არბიტრი იყო, ე.წ. მოდულის შენობაშიცოტა ხნის წინ მივიდა.

მისი თქმით, შვილის დაკავების შესახებ გუშინ გაიგო.

„გუშინ შუადღეს დამირეკეს და მითხრეს, რომ შენი შვილი დაკავებულია. ის მე კადრებშიც ვიცანი. ფედერაციამ სწორი გადაწყვეტილება მიიღო. მეც რომ ვყოფილიყავი სამსაჯო კომიტეტის წარმომადგენელი, მეც გავათავისუფლებდი მათ, რადგან არასწორი საქციელი ჩაიდინეს“, - განაცხადა გურამ ასკაროღლიმ.

მსაჯების ადვოკატებს საქმის გასაჩივრების გადაწყვეტილება ჯერ არ მიუღიათ. ისინი ამ წუთებში ე.წ. მოდულის შენობაში იმყოფებიან, სადაც მათ დაკავებულების საქმის მასალებს გადასცემენ.

რაც შეეხება ზვიად ასკაროღლის, მან სამი თვის წინ ჩააბარა ნორმატივები და სწორედ ამ დროიდან დაიწყო მსაჯობა.