26 სექტემბერს, 17:00 საათზე საქართველოს კულტურისა და ძეგლთა დაცვის სამინისტროში (სანაპიროს ქ.N 4,მე-5 სართული) წიგნის - ,,მე მოვალ თქვენთან" პრეზენტაცია შედგება. გამოცემაში, რომელიც საქართველოს კულტურისა და ძეგლთა დაცვის სამინისტროს მხარდაჭერით გამოვიდა, აფხაზეთის ომში დაღუპული მეომრების - თენგიზ ძაძამიასა და ნუკრი ცისკაძის ლექსებია შესული. წიგნის ილუსტრაციებად გამოყენებულია ასევე ომში დაღუპული მხატვრების - სანდრო ვაჩეიშვილისა და ვახტანგ თედიაშვილის ნახატები. პროექტის ავტორი და რედაქტორი პროფესორი სალომე კაპანაძეა.

წიგნი ეძღვნება სოხუმის დაცემის ტრაგიკულ დღეს - 27 სექტემბერს და იგი კიდევ ერთხელ შეახსენებს საზოგადოებას, რომ ქვეყანა ვალშია ამ გმირების წინაშე, რომ ისინი ბრძოლაში არ დამარცხებულან. ბრძოლა მათ წააგეს, ვინც იმ დღეებში ცისფერ ეკრანზე ადევნებდა თვალს, თუ როგორ იცლებოდა სისხლისგან მისი ქვეყანა აფხაზეთსა და სამაჩაბლოში.

პრეზენტაციაზე მოწვეული არიან საქართველოს კულტურისა და ძეგლთა დაცვის მინისტრი მიხეილ გიორგაძე, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი სოზარ სუბარი, საქართველოს ომის ვეტერანთა დეპარტამენტის უფროსი ირაკლი შიხიაშვილი, აფხაზეთის ომის ვეტერანები, ცნობილი სახელმწიფო და საზოგადო მოღვაწეები.