ბათუმში დღეს დილიდან სიტუაცია სტაბილურია. მნიშვნელოვნად იკლო შტორმის სიმძლავრემ, თუმცა ამ დროისთვის ისევ წვიმს.

ქალაქის დატბორილი ნაწილი წყლისგან გათავისუფლებულია, გაწმენდილია არხები, რომელიც ქალაქის სანიაღვრე სისტემას ზღვასთან აკავშირებს.

ძლიერი შტორმის გამო, ბათუმის ბულვარები შლამითა და ნატანი მასალითაა დაფარული. გაწმენდითი სამუშაოები გამოდარების შემდეგ დაიწყება.

აჭარაში სინოპტიკოსები წვიმას კვლავ პროგნოზირებენ. შესაძლო სტიქიის პრევენციისთვის ქალაქში ტექნიკა და შესაბამისი სამსახურებია მობილიზებული, მუშაობს სპეციალური სამთავრობო შტაბიც.

რაც შეეხება ამინდს, ქვეყნის მასშტაბით ნალექის რაოდენობა დღეს, დღის მეორე ნახევრიდან შემცირდება.

სინოპტიკოსების პროგნოზით, დღეს როგორც აღმოსავლეთ საქართველოში, ისე დედაქალაქში ძლიერი ქარი, მაღალმთიან რაიონებში კი თოვლ-ჭყაპია მოსალოდნელი.