საქართველოზე ნარკოგადაზიდვების 6 მარშრუტი გადის- ამის შესახებ ნარკოტიკების და დანაშაულის მონიტორინგის ცენტრის დირექტორი პაატა ნოზაძე, გაზეთ „ალიასთან“ ინტერვიუში აცხადებს.

ნოზაძის თქმით, არსებობს სამი ძირითადი ნარკოტრასა, პირველი- „ჩრდილოეთის გზა“ : ავღანეთი-ცენტრალური აზია-რუსეთი. მეორე- „ბალკანური გზა“ : ავღანეთი-ირანი-თურქეთი-ევროპა. მესამე- „სამხრეთის მიმართულება“: ავღანეთი-პაკისტანი და პაკისტანის საზღვაო პორტიდან ნებისმიერი მიმართულებით. საქართველო არის ძირითადად ტრანზიტული ქვეყანა, აქ შემოტანილი ნარკოტიკების ნაწილი რჩება ადგილობრივი მოხმარებისთვის, დანარჩენი გადის ევროპაში.

ნოზაძის განცხადებით ნარკობიზნესის ყოველწლიური ბრუნვა 600 მილიარდიდან 1 ტრილიონამდე დოლარს აღწევს.
„ ნარკოტიკების დაჭერა ძალიან ძნელია, თუ არ გაქვს წინასწარი ოპერატიული ინფორმაცია, ყველა სახის ტვირთის გაჩხრეკა შეუძლებელია. არსებობს შერჩევითი შემოწმების მეთოდი, სადაც ტვირთები ჩავარდა, იქ მეტწილად ადგილი ქონდა წინასწარი ინფორმაციის მოპოვებას. ტონობით ჰეროინი , რომ აღმოაჩინო , ეს იმას არ ნიშნავს , რომ მიმართულება დაიკეტა, შეიძლება რამდენიმე დღით შეჩერდეს, მაგრამ მერე ისევ იწყება. საცდელი პარტია წამოვა, გაივლის-კარგია, არ გაივლის და არაუშავს. დღეს რომ ნარკობიზნესი წამგებიანი გახადო, წარმოებული პროდუქციის დაახლოებით 2/3 მაინც უნდა ამოიღო, ამოღების საუკეთესო მაჩვენებელი კი 20-25%-ია. მაფიამ ერთი, ორი და სამი ტვირთიც რომ დაკარგოს წაგებაზე მაინც ვერ წავა, ეს წინასწარ აქვს გათვლილი.“-აღნიშნავს ნოზაძე.

ნოზაძე თხევად ჰეროინთან დაკავშირებითაც აკეთებს კომენტარს და აღნიშნავს, რომ თხევადი ჰეროინი ამ ფორმით უფრო ადვილი გასატანია, რადგან დოკუმენტში უთითებენ, რომ ეს სარეცხი საშუალებაა. ყველა ტრაილერის და ყველა სარეცხი საშუალების შემოწმების და გასინჯვის კი არც დროა და ფიზიკურად შეუძლებალია.