აჭარაში საგანგებო სხდომა დასრულდა. მიღებულია გადაწყვეტილება, რომ ქობულეთსა და ხელვაჩაურში მეწყრის შედეგად დაზარალებული რვა ოჯახისთვის დროებითი საცხოვრებელები გამოიყოფა, 15 ოჯახის სახლებს კი გეოლოგები შეისწავლიან, რის შემდეგაც ადგილზე სარეაბილიტაციო სამუშაოები ჩატარდება.

სტიქიის სალიკვიდაციო შტაბს მეწყერსაშიში ზონიდან სულ 100-მდე ოჯახმა მიმართა. ძლიერი წვიმის შედეგად მიყენებულ ზარალს ითვლიან ბათუმშიც. ბოლო მონაცემებით, დაიტბორა ქალაქის ექვსი უბანი. მათი დიდი ნაწილი წყლისგან უკვე გაწმენდილია. ამ ეტაპზე ამოტუმბვითი სამუშაოები ე.წ. ჭაობის დასახლებაში მიმდინარეობს.

აჭარაში შექმნილ ვითარებაზე მსჯელობდნენ საგანგებო შტაბში, რომელსაც სახელმწიფო უსაფრთხოებისა და კრიზისების მართვის საბჭოს მდივანი ხელმძღვანელობს. მინდია ჯანელიძის თქმით, ღამის 12 საათიდან ბათუმში ამინდის გაუარესებაა მოსალოდნელი, რის გამოც პრევენციის მიზნით სპეციალური სამსახურები იქნება მობილიზებული. დღის ბოლოს შტაბი კიდევ შეიკრიბება და სტიქიის სალიკვიდაციო სამუშაოების კონკრეტულ გეგმას შეიმუშავებს.