სახელმწიფო უსაფრთხოებისა და კრიზისების მართვის საბჭოს მდივანმა მინდია ჯანელიძემ აჭარის მთავრობის თავმჯდომარესთან არჩილ ხაბაძესთან ერთად დღეს ოპერატიული თათბირი გამართა. მათ სტიქიის ზონაში არსებული მდგომარეობის და მიმდინარე სალიკვიდაციო სამუშაობის შესახებ დეტალური ინფორმაცია მოისმენეს. თათბირს ესწრებოდნენ შინაგან საქმეთა, რეგიონული განვითარებისა დაინფრასტრუქტურის, გარემოს დაცვის სამინისტროების, ასევე, აჭარის მთავრობის წევრები და მუნიციპალიტეტების წარმომადგენლები.

სახელმწიფო უსაფრთხოებისა და კრიზისების მართვის საბჭოს თავმჯდომარემ თათბირის შემდეგ განაცხადა, რომ წინასწარი ინფორმაციით მოსალოდნელია ამინდის გაუარესება, რაც სავარაუდოდ ზღვაში შტორმს გამოიწვევს, თუმცა საგანგაშო მდგომარეობა ნამდვილად არ არის. ყველა სამსახური მობილიზებულია, რომ მზად დახვდეს მოსალოდნელ სტიქიას. განსაზღვრულია ყველა სარისკო ადგილები, მომზადებულია ჯგუფები, რომლებიც ყველა შესაძლო გართულებაზე მოახდენენ რეაგირებას. ისინი, ვინც იმყოფებიან რისკის ქვეშ, გადაყვანილნი იქნებიან უსაფრთხო ადგილას და უზრუნველყოფილნი იქნებიან საჭირო ინვენტარით.

„დღევანდელ შეხვედრაზე არსებული სიტუაცია შევაჯამეთ და დავგეგმეთ სამომავლო მოქმედებები. მოვისმინეთ გეოლოგების დასკვნა. ასამდე გამოძახება დაფიქსირდა ჯამში. საქართველოს გარემოს დაცვის სამინისტროსა და აჭარის დეპარტამენტის გეოლოგები 100-ივე გამოძახებას შეისწავლიან და დღის ბოლოს უკვე დასკვნა გვექნება. ხვალ ამინდის გაუარესებას ველით. შესაბამისი დავალებები მიეცათ მუნიციპალიტეტებს, მერიის, შინაგანსაქმეთა სამმართველოს და ყველა შესაბამის სტრუქტურას, რომელიც შეიძლება ჩართული იყოს კრიზისის მართვაში მიეცათ დავალებები. საღამოს 18:00-ზე ისევ ჩატარდება თათბირი და მოხდება საბოლოო მონაცემების შეჯამება. შექმნილი იქნება ჯგუფები, რომლებიც მობილიზებულნი იქნებიან და დროულად მოახდენენ რეაგირებას“ განაცხადა არჩილ ხაბაძემ.

21 სექტემბერს, აჭარის რეგიონში, ძლიერი წვიმისა და ქარიშხლის შედეგად, მწყობრიდან გამოვიდა ელექტროგადამცემი ხაზები, რამდენიმე მონაკვეთზე დაზიანდა ბუნებრივი აირის მილები, მოგლეჯილია ხეები. ძლიერმა ქარმა დააზიანა საცხოვრებელი სახლების სახურავები. წვიმის შედეგად ხელვაჩაურსა და ქობულეთში მეწყრული მოვლენები დაფიქსირდა. ბათუმსა და ქობულეთში დაიტბორა ცენტრალური ქუჩები დაგარეუბნები.