ირაკლი ღარიბაშვილი ღვინის ქარხანა „გრუზვინპრომს" ესტუმრა

საზოგადოება - 15:02, 18 Sep, 2014

2525

საქართველოს პრემიერ–მინისტრი ირაკლი ღარიბაშვილი კახეთში იმყოფება, სადაც რთველის პროცესის მიმდინარეობას ეცნობა. ამ მიზნით, მთავრობის მეთაური ღვინის ქარხანა „გრუზვინპრომს" ესტუმრა და კომპანიის საქმიანობით დაინტერესდა.
პრემიერი ყურძნის გადამუშავების პროცესს დაესწრო და ქარხნის ლაბორატორია მოინახულა, სადაც ღვინის სრული ანალიზი ტარდება. პრემიერმა 460 ყურძნის ჯიშისგან დამზადებული ღვინო ჟურნალისტებთან ერთად დააგემოვნა.
ქარხნის დირექტორის, დავით თოფურიძის განმარტებით, კომპანიის ძირითადი საქმიანობის სფეროს, როგორც ღვინისა და საბრენდე სპირტის წარმოება, ასევე ყურძნის კონცენტრატის დამზადება წარმოადგენს. კომპანია ყურძენს კახეთის მოსახლეობისგან შეისყიდის. საწარმოში ფუნქციონირებს იტალიური წარმოების DELLA TOFFOLA-ს ფირმის ყურძნის მიღება-გადამუშავების ხაზი.
როგორც ქარხანაში სტუმრობისას პრემიერმა განაცხადა, სუბსიდირებისა და აგროსესხების თვისობრივად განსხვავებული სისტემის გატარებით, სახელმწიფო სტიმულს აძლევს კერძო სექტორს – მიიღონ და გადაამუშაონ უფრო მეტი ოდენობის ყურძენი, რაც ფერმერებსა და ღვინის მწარმოებელ კომპანიებს ბიზნესის განვითარებისა და ვენახების გაფართოების საშუალებას აძლევს.
“რაც მთავარია, დღეს ჩვენ გვაქვს გასაღების ბაზარი. ჩვენი მთავრობის აქტიური მუშაობის შედეგია, რომ ქართული ღვინო დაბრუნდა რუსეთის ბაზარზე. 2013 წელს ღვინის ექსპორტმა სულ 46,7მლნ ბოთლი შეადგინა, და ეს ციფრი ორჯერ აღემატება 2012 წლის მაჩვენებელს. მინდა გითხრათ, რომ ზრდის ტენდენცია გრძელდება,”-აღნიშნა ირაკლი ღარიბაშვილმა.
2014 წლის 17 სექტემბრის მონაცემებით, ღვინის ქარხნების მიერ ინდუსტრიულად გადამუშავებულია 50 ათას ტონამდე ყურძენი. ამ ეტაპისთვის, მევენახეების მიერ მიღებულმა შემოსავალმა უკვე 50მლნ. ლარს გადააჭარბა. კახეთის რეგიონში ყურძნის მიღება-გადამუშავებას სულ 75 საწარმო ახორციელებს.