ტელეკომპანია TVS-ის გენერალური დირექტორის თანამდებობაზე გაზეთ "პრაიმტაიმის" დამფუძნებელი თამარ ფხაკაძე დაინიშნა.

ამ ეტაპზე ტელეკომპანიის დამფუძნებლებსა და თამარ ფხაკაძეს შორის ტექნიკური საკითხები თანხმდება.

თავად ფხაკაძე მოლაპარაკების დეტალებზე არ საუბრობს.

„მოლაპარაკება დასკვნით ეტაპზეა, სხვა დეტალებზე საუბრისგან თავს შევიკავებ, რადგან მიმდინარეობს მუშაობა ტელევიზიის კონცეფციაზე და სხვა ტექნიკურ საკითხებზე“,- განაცხადა ფხაკაძემ.

- არხი ძირითადად სპორტულ გადაცემებს შესთავაზებს მაყურებელს, თუ სხვასიახლეებიც გექნებათ?

- ამ ეტაპზე ერთი რამ შემიძლია გითხრათ: მაყურებელს ძალიან საინტერესო პროდუქტს შევთავაზებთ. ეს იქნება არხი, სადაც ყველა სეგმენტი, ყველა ტიპის მაყურებელი იპოვის მისთვის საინტერესო თემას.

- როდის დაიწყებთ მაუწყებლობას?

- ჩვენ უკვე დავიწყეთ მუშაობა. რაც შეეხება ეთერში გასვლის თარიღს, ამაზე საუბარი ჯერ ადრეა. ამ ეტაპზე ინტენსიურად მიმდინარეობს შიდა სამუშაოები.

- რაც შეეხება გაზეთ "პრაიმტაიმს", ხომ არ მოხდება ორი მედიასაშუალებისინტერგრაცია?

- გაზეთი "პრაიმტაიმი", სააგენტო "პრაიმტაიმნიუსი" და "პრაიმტაიმის" პრესკლუბი - – ყველა ამ მედიასაშუალებაში მე ვრჩები დამფუძნებლად და რა დოზითაც ვმონაწილეობდი ამ მედიაჰოლდინგის მართვაში, ზუსტად იმ დოზით გავარძელებ მოღვაწეობას. უბრალოდ ჩემს პროექტებს დაემატება კიდევ ერთი - ტელევიზია...რაც შეეხება ინტეგრაციას, ამ თემაზე ლაპარაკი არ მიდის, ისინი იქნებიან ორი ერთმანეთისგან დამოუკიდებელი მედიასაშუალება. მეტს ამ ეტაპზე ვერაფერს გეტყვით.

წყარო: frontnews.ge