რუსთავი-თბილისის ავტომაგისტრალის მშენებლობა გრძელდება

საზოგადოება - 16:22, 16 Sep, 2014

2767

რუსთავი-თბილისის ავტომაგისტრალის სამშენებლო სამუშაოები გრძელდება. ავტომაგისტრალის მშენებლობის პროცესს, საქართველოს მუნიციპალური განვითარების ფონდის აღმასრულებელი დირექტორი გიორგი ამაშუკელი, პარლამენტის ვიცე-სპიკერი, რუსთავის მაჟორიტარი დეპუტატი ზვიად ძიძიგური, რუსთავის მერი დავით ჯიქია, თბილისის მერიის წარმომადგენლები, დღეს ფონიჭალა-რუსთავის გზის მონაკვეთზე გაეცნენ.
გიორგი ამაშუკელი, ზვიად ძიძიგური და დავით ჯიქია ავტომაგისტრალის მშენებელ კომპანია ,,სინოჰიდრო კორპორეიშენ ლიმიტედის" წარმომადგენლებს და გზის მშენებლობაზე დასაქმებულ მუშა-მოსამსახურეებს გაესაუბრნენ და მათგან მიიღეს დეტალური ინფორმაცია.
,,დღეის მდგომარეობით, აქტიურ ფაზაშია პირველი და მესამე ლოტის სამუშაოები, რომელსაც ახორციელებს ტენდერში გამარჯვებული ჩინური კომპანია. ობიექტზე 250 ადამიანია დასაქმებული, რომელთა უმეტესობა ჩვენი ქვეყნის მოსახლეობაა. სულ მალე ჩვენ ტენდერს გამოვაცხადებთ აღნიშნული მონაკვეთის მეორე ლოტზე, რის შემდეგაც დამატებითი სამუშაო ადგილები გაჩნდება. მეორე ლოტის საპროექტო დოკუმენტაცია უკვე გადაგზავნილია აზიის განვითარების ბანკში და ვფიქრობთ, რომ უკვე გაზაფხულისთვის გამოვაცხადებთ ტენდერს", - აღნიშნა ამაშუკელმა.
ზვიად ძიძიგურის განცხადებით, აღნიშნულ მონაკვეთზე სამუშაოები აქტიურად მიმდინარეობს და ბეტონის საფარი უკვე დეკემბერში დაიგება.
"მე კარგად მახსოვს, მიხეილ სააკაშვილმა 2012 წელს არჩევნების წინ, როგორ შეკრიბა მერიის თანამშრომლები და გამოაცხადა, რომ ვიწყებთ მშენებლობასო, როცა არც პროექტი არსებობდა და არც ტენდერი იყო ჩატარებული. ეს ექვს კილომეტრიანი მონაკვეთი, რომელიც რუსთავს უერთდება, ბეტონით დეკემბერში დაიფარება", - განაცხადა ზვიად ძიძიგურმა.
რუსთავის მერის დავით ჯიქიას განცხადებით, ავტომაგისტრალის მშენებლობის დასრულების შემდეგ რუსთავი-თბილისის გზის მონაკვეთზე ავტოსაგზაო შემთხვევების რაოდენობა საგრძნობლად შემცირდება.
,,მშენებლობის დასრულების შემდეგ გზის ეს მონაკვეთი გაფართოვდება და გარდა ამისა, თბილისამდე ჩასვლა გაცილებით მოკლე დროში იქნება შესაძლებელი. გზის სივიწროვის გამო ძალიან ხშირად ხდება ავტოსაგზაო შემთხვევები, ავტომაგისტრალის მშენებლობის დასრულების შემდეგ, ბუნებრივია გზა განიტვირთება და შესაბამისად, ავარიების რაოდენობაც შემცირდება", - განაცხადა დავით ჯიქიამ.
რუსთავი-თბილისის ავტომაგისტრალის პირველი და მესამე მონაკვეთის მშენებლობა მიმდინარე წლის 22 აპრილს დაიწყო. კონტრაქტის ვადა 17 თვეა, პირველ ეტაპზე პირველი და მესამე მონაკვეთის მშენებლობა მიმდინარეობს, რაზეც 88 761 128 ლარია განსაზღვრული. ავტომაგისტრალის მშენებლობაზე 250 ადამიანია დასაქმებული, მათ შორის 150 ადგილობრივი მუშა-ხელია. ამჟამად პროექტის ფარგლებში მიწის, რკინა-ბეტონის ხიდებისა და სხვა საჭირო ნაგებობების სამშენებლო სამუშაოები მიმდინარეობს. რუსთავი-თბილისის ავტომაგისტრალის მშენებლობის პროექტი აზიის განვითარების ბანკისა და საქართველოს მთავრობის მიერ ფინანსდება და საერთაშორისო მნიშვნელობის ,,თბილისი-წითელი ხიდის" (ახერბაიჯანის რესპიბლიკის საზრვარი) საავტომობილო გზის თბილისი-რუსთავის მონაკვეთის მოდერნიზაციას ითვალისწინებს.