ყვარელის რაიონის სოფელ ჭიკაანში, ოთხი სოფლის მოსახლეობამ, ყურძნის ჩაბარების მოთხოვნით გზა გადაკეტა. ადგილობრივები აცხადებენ, რომ კახეთში არც ერთი ღვინის ქარხანა ყურძენს არ იბარებს, მევენახეებს კი დაუკრეფავი ყურძენი უფუჭდებათ. აქციის გამო რამდენიმე საათი ჭიკაანის ცენტრალური გზა გადაკეტილი იყო. გლეხები კომპანიებთან შუამდგომლობას ხელისუფლებას სთხოვენ.

„ქარხნების უმეტესობა არის კერძო. ისინი საუკეთესო ყურძენს არჩევენ. ჩვენ რა ვქნათ, ვიწვალეთ, მოვიყვანეთ, სტიქიამ დაგვაზარალა. რა უნდა ვქნათ? სად წავიღოთ ეს ყურძენი? პასუხს არავინ გვაძლევს“, - აცხადებენ ადგილობრივები.

აქციის მონაწილეებს ქარხნებში არსებული მდგომარეობა ღვინის ეროვნული სააგენტოს ხელმძრვანელმა განუმარტა. არსებული ინფორმაციით, ყურძნის ჩაბარებას ხვალიდან სახელმწიფო კომპანიები დაიწყებენ. ცნობილია, რომ საღ ყურძენს 1 ლარად, ხოლო დაზიანებულს 50 თეთრად ჩაიბარებენ.