სააკაშვილის საპრეზიდენტო ბიბლიოთეკაში საუკეთესო აბიტურიენტებთან შეხვედრა გაიმართება

საზოგადოება - 14:59, 15 Sep, 2014

1997

ახალგაზრდული ჯგუფის „მე ვარ აბიტურიენტის“ ინიციატივით, სააკაშვილის საპრეზიდენტო ბიბლიოთეკაში, იმ აბიტურიენტებთან შეხვედრა გაიმართება, რომლებმაც საქართველოს მასშტაბით “ერთიანი ეროვნული გამოცდები 2014" საუკეთესო შედეგებით ჩააბარეს.

როგორც ,,ნიუპოსტს“ საპრეზიდენტო ბიბილიოთეკიდან აცნობეს, ბოლო წლების განმავლობაში ტრადიციად იქცა ყველაზე წარმატებული აბიტურიენტების პრეზიდენტთან შეხვედრა. წელს კი, ეს ღონისძიება თავად სტუდენტების ინიციატივით ტარდება. მათ მიმართეს სააკაშვილის საპრეზიდენტო ბიბლიოთეკას, რომლის ორგანიზებით საუკეთესო აბიტურიენტებს მიხეილ სააკაშვილი ინტერნეტის მეშვეობით გაესაუბრება და სტუმრების შეკითხვებს უპასუხებს. აბიტურიენტებს გადაეცემათ სამახსოვრო საჩუქრები.

ამასთან, როგორც დღეს გახდა ცნობილი, საქართველოს მესამე პრეზიდენტის ხელშეწყობით 2014/2015 სასწავლო წლის ბოლოს, ის 2 საუკეთესო აბიტურიენტი, რომელიც ასევე უმაღლესი შედეგებით დაამთავრებს პირველი სასწავლო წლის 2 სემესტრს, ამერიკის შეერთებულ შტატებში საზაფხულო სტაჟირებაზე გაემგზავრება ლიდერობის ახალ საერთაშორისო ინსტიტუტში (New International Leadership Institute).