ტურიზმის დეპარტამენტის ყოფილმა ხელმძღვანელმა გიორგი სიგუამ "რუსთავი 2"- ის გადაცემა „ბიზნესკურიერში“ ფესტივალ „კაზანტიპთან“ დაკავშირებულ პრობლემებზე ისაუბრა.

სიგუას განცხადებით, მოსაზრება რომ „კაზანტიპის“ საქართველოში გადმოტანა ყირიმის ანექსიის გამო მოხდა მცდარია.

„ძალიან ხშირად ფიქრობენ რომ ნიკიტა არის უკრაინელი და კაზანტიპი არის უკრაინული და ყირიმის ანექსიის შემდეგ, ეს ფესტივალი გამოიქცა უკრაინიდან. ეს მოსაზრება არის მცდარი, კაზანტიპის აუდიტორიის 70 % არის რუსი, ნიკიტაც არის მოსკოველი რუსი. მასზე ფესტივალის ყირიმში ჩატარება არავითარ დისკომფორტს არ მოახდენდა“, - აცხადებს სიგუა.

სიგუას თქმით, მისი ვიზიტი მოსკოვში მარშუნოკთან და ის დაპირებები რაც მან მარშუნოკს მისცა შეთანხმებული იყო ხელმძღვანელობასთან, შემდეგ კი მოხდა ამ დაპირებების გადათქმა.

„დაპირება იყო უსაფრთხოება, რომელიც შესრულდა ხუთიანზე. დაპირება - სარეკლამო მხარდაჭერა არ განხორციელდა, პირდაპირ კვირიკაშვილის დავალებით. დაპირება -ინფრასტრუქტურული მხარდაჭერა არ განხორციელდა, კაბელიც კი მარშუნოკის ჯიბიდან გახდა საყიდელი. დაპირება- მიწის გადაცემა 10 წლიანი იჯარით არ განხორციელდა და კაზანტიპს მიწა გადასცეს მხოლოდ 10 დღით. ჩატარდა ფოკუსები, ცხრასვლიანი კომბინაციები და ყველაფერი გაკეთდა იმისთვის რომ ეკონომიკის სამინისტროს ხელი არ მოეწერა ნიკიტა მარშუნოკთან კონტრაქტზე, რადგან ჩაითვალა რომ ნიკიტა მარშუნოკი არის ეშმაკის მოციქული და ეშმაკისგან გამოგზავნილი. როდესაც მე მივდიოდი მარშუნოკთან მოსალაპარაკებლად, კვირიკაშვილმა და ქუმსიშვილმა ალბათ ჩათვალეს რომ ჩვენ აქ უნდა მოგვეწყო ალეგროვას და კირკოროვის კონცერტი, კარგად არ ქონდათ გათავისებული რაზე იყო ლაპარაკი. მას შემდეგ რაც გიორგი კვირიკაშვილს ქონდა შეხვედრა სასულიერო პირებთან მან მე მითხრა, რომ არ სურს იყოს ადამიანი, რომელიც დაუპირისპირდება სასულიერო პირებს და ამიტომ უმჯობესია ეს ღონისძიება ჩავშალოთ, ჩვენ თვითონ დავხარჯოთ ფული და ჩავატაროთ რაღაცა. მე არ დავთანხმდი რადგან ეს იქნებოდა წყალში გადაყრილი თანხა, ჩვენ გავხდებოდით დასაცინი, როცა გყავს ინვესტორი რომელიც კაპიკს არ გთხოვს აქეთ მოაქვს ფული და უზარმაზარი ინვესტიციები და როგორ შეიძლება ამის ნაცვლად შენ სახელმწიფო ფული აიღო და დახარჯო , ამაზე მე უარი განვაცხადე.“- აცხადებს სიგუა.

გიორგი სიგუამ კომენტარი კომპანია „სნოსთან“ დაკავშირებითაც გააკეთა „არა მარტო დაფინანსება და სპონსორობა ქონდათ განზრახული „სნო“-ს, არამედ მათ უნდოდათ რომ ყოფილიყვნენ წყლის ექსკლუზიური გამყიდველები, რაც იყო საკმაოდ ძვირადღირებული ლოტი, მაგრამ სნოს ამას იღებდა სრულიად უფასოდ, შეთანხმება ბოლომდე იყო მისული. მაგრამ შემდეგ რაც ჟურნალისტებმა ამოქექეს ეს ამბავი, ჩათვალეს რომ უმჯობესი იქნებოდა დისტანცირება მოეხდინათ ამ ფესტივალიდან.“- განაცხადა სიგუამ.

სიგუას განცხადებით, ის აპირებს საქართველოს მთავრობას და საზოგადოებას წარუდგინოს გეგმა, თუ როგორ უნდა მოხდეს ანაკლია-განმუხურის ტერიტორიის მსოფლიო საფესტივალო ტურისტულ ცენტრად გადაქცევა.

„უკვე 4 ფესტივალი მზად არის სათანადო მხარდაჭერის შემთხვევაში, მაისიდან ოქტოიმბრის ჩათვლით ეს ადგილი გააცოცხლოს და აქციოს მსოფლიო ახალგაზრდული ტურიზმის მექად. დარწმუნებული ვარ რომ პრემიერ-მინისტრისგან მხარდაჭერა მექნება, მაგრამ არ მაქვს იმედი კვირიკაშვილის მხარდაჭერის“, - აცხადებს სიგუა.