დავით ალავიძე "ლიბერთი ბანკთან" დაკავშირებით ნარმანიას განცხადებას ეხმაურება

საზოგადოება - 13:30, 12 Sep, 2014

2082

თბილისის მერის ყოფილი მოადგილზე დავით ალავიძე „ლიბერთი ბანკთან“ დაკავშირებით დავით ნარმანიას განცხადებას ეხმაურება.

მისი თქმით, თბილისის მერს საკუთარი განცხადებების გამო ბოდიშის მოხდა აუცილებლად მოუწევს.

“სს ,,ლიბერთი ბანკს“ და თბილისის მერიას შორის 2010 წლის 26 აპრილს გაფორმდა საბანკო მომსახურების შესახებ ხელშეკრულება. ამ ხელშეკრულებით ბანკი მერიის ანგარიშებზე არსებულ მიმდინარე ნაშთებს არიცხავდა სარგებელს წლიური 16.05%-ის ოდენობით ლარში არსებულ თანხებზე. ხელშეკრულება გაფორმებული იყო 1 წლის ვადით, მისი ამავე ვადით შემდგომში გაგრძელების პირობით. შესაბამისად, 2013 წლის 26 აპრილს ხელშეკრულებას ვადა გადიოდა და ახალი შეთანხმების გაფორმება ბანკთან აუცილებელი იყო, იმისთვის, რომ მერია არ დარჩენილიყო საბანკო მომსახურების გარეშე.

საბანკო სექტორში არსებული საპროცენტო განაკვეთები მნიშვნელოვნად იყო შემცირებული ამ პერიოდისათვის. შესაბამისად, ,,ლიბერთი ბანკმა“ არ ისურვა თბილისის მერიასთან ხელშეკრულების გაგრძელება იმავე პირობებით. საქართველოში მოქმედმა სხვა კომერციულმა ბანკებმა თბილისის მერიას შეთავაზეს არაუმეტეს 8%-ის სარგებლის დარიცხვა. საბოლოო ჯამში, ხანგრძლივი მოლაპარაკებების შემდგომ ისევ ,,ლიბერთი ბანკთან“ მოხერხდა იმ დროს ბაზარზე არსებული საუკეთესო პირობებით ხელშეკრულების გაფორმება, რაც გულისხმობდა ანგარიშებზე არსებულ 40 მილიონ ლარზე კვლავ 16% სარგებლის დარიცხვას და ამის ზემოთ არსებულ ნაშთებზე 4%-ის.
რაც შეეხება სს ,,ლიბერთი ბანკისა“ და თბილისის მერიის თანამდებობის პირების, მათ შორის ჩემს, დადანაშაულებას კორუფციულ გარიგებაში, ეს დავით ნარმანიას მხრიდან დაუსაბუთებელი ცილისწამებაა, რაც ლახავს ჩემს ღირსებას და საქმიან რეპუტაციას. ამ ტიპის განცხადება დამანგრეეველია საბანკო სექტორის რეპუტაციისთვისაც, რასაც ჩინოვნიკი ნარმანია უნდა აცნობიერებდეს. შესაბამისად, დავით ნარმანიას აუცილებლად მოუწევს ბოდიშის მოხდა საკუთარი უპასუხისმგებლო და უვიცი განცხადებების გამო”, - აცხადებს ალავიძე.