სატყეო ფაკულტეტის 20-მდე სტუდენტი 2 თვიან სასწავლო კურს გარემოს დაცვის სამინისტროში გაივლის

საზოგადოება - 19:14, 11 Sep, 2014

1438

საქართველოს პრემიერ-მინისტრის ინიციატივის ფარგლებში “სტაჟირება საჯარო სამსახურში“, სხვადასხვა უნივერსიტეტის კურსდამთავრებული სატყეო ფაკულტეტის 20-მდე სტუდენტი 2 თვიან სასწავლო კურსსა და საველე პრაქტიკას გარემოსა და ბუნებრივი რესურსების დაცვის სამინისტროში გაივლის.

სწავლის დასრულების შემდეგ, მომავალი ტაქსატორები ეროვნულ სატყეო სააგენტოში დასაქმდებიან და საქართველოს მასშტაბით დაგეგმილ ტყეების ინვენტარიზაციის პროცესში ჩაერთვებიან.

დღეს, საქართველოს გარემოსა და ბუნებრივი რესურსების დაცვის მინისტრის მოადგილემ თეიმურაზ მურღულიამ სატყეო ფაკულტეტის კურსდამთავრებულ სტუდენტებს ახალგაზრდა სპეციალისტთა ტყის ტაქსაციაში გადამზადების სასწავლო კურსის დაიწყება მიულოცა.

პროექტი გარემოსდაცვითი ინფორმაციისა და განათლების ცენტრისა და ეროვნული სატყეო სააგენტოს ორგანიზებითა და გერმანიის საერთაშორისო თანამშრომლობის საზოგადოების (GIZ) მხარდაჭერით ხორციელდება.

ტრენინგების მიზანია ეროვნული სატყეო სააგენტოს შესაძლებლობების გაძლიერებისთვის ტყეთმომწყობის - ტაქსატორების მომზადება და მათი აღჭურვა შესაბამისი ცოდნითა და უნარ-ჩვევებით. სტუდენტებს თეორიულ და პრაქტიკულ მეცადინეობებს შესაბამისი გამოცდილების მქონე ადგილობრივი ექსპერტები ჩაუტარებენ.

“ინვენტარიზაცია ქვეყანაში სატყეო პოლიტიკის შემუშავების მნიშვნელოვანი კომპონენტია. ტაქსაციის განხორციელება საშუალებას იძლევა განვსაზღვროთ რეალურად თუ რა ბუნებრივ რესურსს ვფლობთ, შევიმუშავოთ ტყის მდგრადი მართვის სტრატეგია და სწორად დაიგეგმოს სატყეო -სამეურნეო ღონისძიებები “- განაცხადა თეიმურაზ მურღულიამ.