დასაქმების ხელშეწყობის მიზნით სტაჟირების კურსი 14 ყოფილმა პატიმარმა წარმატებით დაასრულა

საზოგადოება - 14:55, 11 Sep, 2014

1576

თბილისის იუსტიციის სახლში ყოფილ პატიმართა სტაჟირების პროექტის დასკვნითი შეხვედრა გაიმართა.
საქართველოს იუსტიციის მინისტრი თეა წულუკიანი, მინისტრის მოადგილე ალექსანდრე ტაბატაძე და დანაშაულის პრევენციის ცენტრის დირექტორი ჯონი კვინიკაძე პროგრამაში მონაწილე კომპანიების წარმომადგენლებსა და ბენეფიციარებს შეხვდნენ.
შეხვედრას საპატიო სტუმრის სტატუსით კომპანია „Geo Co“-ს გენერალური დირექტორი ვახტანგ ნიკოლავა დაესწრო, რომელიც რეაბილიტაცია-რესოციალიზაციის პროგრამის გამორჩეული პარტნიორია. საკუთარ სამშენებლო კომპანიაში ვახტანგ ნიკოლავამ პროგრამის ბენეფიციარი 11 პატიმარი სხვადასხვა სამუშაოზე დაასაქმა.

„დღეს, როგორც არასდროს, აქტუალურია დანაშაულის პრევენციის ცენტრის ის პროგრამა, რომელიც ჩემი ინიციატივით დაწყო 2012 წლის ნოემბერ-დეკემბერში. ეს არის ყოფილი პატიმრების რესოციალიზაცია-რეაბილიტაცია. ჩვენ ბოლო ორი წლის განმავლობაში 600-ზე მეტ პატიმარს მივეცით პროგრამაში ჩართვის შესაძლებლობა. მათგან არაერთი უკვე რეაბილიტირებულია და თავს გრძნობს საზოგადოების სრულფასოვან წევრად“, − განაცხადა იუსტიციის მინისტრმა.
თეა წულუკიანმა სტაჟირების პროგრამაზეც ისაუბრა და აღნიშნა, რომ კერძო სექტორში ყოფილი პატიმრების სტაჟირებისათვის იუსტიციის სამინისტრომ საგრანტო პროგრამა განახორციელა.

„სახელმწიფოსა და კერძო სექტორის თანამშრომლობა ამ კუთხით გადამწყვეტი მნიშვნელობისაა... ყოფილ პატიმარზე ზრუნვა არის საზოგადოების დაცვა განმეორებითი დანაშაულისაგან… მე კერძო სექტორის ყველა წარმომადგენელს მოვუწოდებ, დაგვიკავშირდნენ, მიბაძონ სხვა კომპანიებს და სახელმწიფოსთან ერთად იმუშაონ თანამედროვე სახელმწიფოს ჩამოყალიბებისათვის“, − განაცხადა თეა წულუკიანმა. მინისტრმა განსაკუთრებული მადლობა გადაუხადა 11 ბენეფიციარის დამსაქმებელ კომპანია „Geo Co“-ს.

საქართველოს იუსტიციის სამინისტროს მმართველობის სფეროში მოქმედი სსიპ „დანაშაულის პრევენციის ცენტრის“ მიერ გამოცხადებული საგრანტო პროგრამა 6 თვეს მიმდინარეობდა. ყოფილ პატიმრებს შესაძლებლობა ჰქონდათ, განევითარებინათ ის საჭირო უნარ-ჩვევები, რაც სამუშაოს მოძიებაში დაეხმარებათ. პროგრამა რამდენიმე ეტაპად განხორციელდა. ყველა ეტაპი წარმატებით 14-მა ბენეფიციარმა დაასრულა.

პროგრამის განხორციელების მიზნით საგრანტო კონკურსში გამარჯვებული საქველმოქმედო ჰუმანიტარული ცენტრი „აფხაზეთი“ მოლაპარაკებას აწარმოებდა 43 კომპანიასთან, თუმცა, პროგრამაში მონაწილეობა სრულად 11-მა შეძლო. მათ შორის არიან როგორც კერძო სექტორის, ისე სახელმწიფო უწყებების წარმომადგენლები.
პროექტის წარმატებით დანერგვის შემთხვევაში, გაიზრდება ყოფილ პატიმართა ამ ტიპის პროექტებში ჩართულობის მოტივაცია. გარდა ამისა, გაიზრდება ორგანიზაციების სოციალური პასუხისმგებლობა, რაც, თავის მხრივ, ხელს შეუწყობს ამ სამიზნე ჯგუფის მიმართ საზოგადოებაში უფრო ლიბერალური დამოკიდებულების ჩამოყალიბებას.

„ყოფილ პატიმართა რეაბილიტაცია-რესოციალიზაციის პროგრამის“ უმთავრესი მიზანი დანაშაულის პრევენცია და განმეორებით დანაშაულისაგან საზოგადოების დაცვაა. ყოფილი პატიმარი, რომელიც საზოგადოებას სრულფასოვან წევრად დაუბრუნდება, უკვე აღარ ჩაიდენს დანაშაულს, რაც ზრდის უსაფრთხო გარემოს ქვეყანაში.

საქართველოს იუსტიციის მინისტრის ინიციატივით 2012 წლის ბოლოს დაწყებულ პროგრამას სსიპ „დანაშაულის პრევენციის ცენტრი“ ახორციელებს. მისი მიზანია სასჯელაღსრულების დაწესებულებებიდან გათავისუფლებული პირების რეაბილიტაციის ხელშეწყობა, მათი დაბრუნება საზოგადოების სრულუფლებიან წევრებად.