კომპანია „სითი პარკმა“ ავტომობილების ნომრების შეცვლა სათავისოდ გამოიყენა. რადგან ავტომობილების ახალი ნომრები ძველის სანაცვლოდ ამ კომპანიის ბაზაში არ არის დარეგისტრირებული, ყველა ახალნომრიანი მანქანა, რომელიც სადგომზე მოიხელთეს 10 ლარით დააჯარიმეს.

უხეში გათვლებით, ამ 10 დღეში „სითი პარკმა“ შესაძლოა 15 000-მდე ავტომფლობელი დააჯარიმა, რაც თბილისელთა ჯიბეებიდან ამოცლილი 150 000 ლარია.

ახალი დიზაინის სანომრე ნიშნების შეცვლასთან დაკავშირებით, შსს-მ განცხადება 3 თვის წინ გააკეთა... „სითი პარკს“ თადარიგი უნდა დაეჭირა და ავტომფლობელები 1-ელ სექტემბრამდე რამდენიმე დღით ადრე გაეფრთხილებინა, რომ ვინც ნომერს შეცვლიდა პარკირების საშვი ახალ ნომერზე გადაეტანა.

კომპანია „სითი პარკმა“ გუშინ გაავრცელა განცხადება. კომპანია ახალი დიზაინის სანომრე ნიშნების მფლობელებს აფრთხილებს, რომ მათ პარკირების საშვი ახალ ნომერზე უნდა გადაიტანონ.

„ახალი დიზაინის სანომრე ნიშნების შემოღებასთან დაკავშირებით „სიტი პარკი“ შეახსენებს ავტომფლობელებს, რომ მათ პარკირების საშვი ახალ ნომრებზე უნდა გადაიტანონ. ამისთვის საჭიროა მოქალაქემ მიაკითხოს „სითი პარკის“ სერვისცენტრს კანდელაკის 47 ნომერში და წარმოადგინოს ცნობა შსს-ს მომსახურების სააგენტოდან, რომ ჩააბარა ძველი სახელმწიფო ნომრები და აიღო ახალი ნომრები. ამ ინფორმაციის საფუძველზე მოხდება პარკირების საშვის გადატანა“,-ნათქვამია კომპანიის მიერ გავრცელებულ განცხადებაში.

წყარო: გაზეთი "ალია"