სავაჭრო ქსელ „გუდვილში“ იტალიური ინვესტიცია შედის. commersant.ge-ს ცნობით, მაღაზიათა ქსელის 60%-ს საინვესტიციო კომპანია „მილან ინვესტმენტი“ ყიდულობს. კომპანიებს შორის ხელშეკრულება უკვე დადებულია და ის ეტაპობრივად ხორციელდება.

სრულად 60%-იანი წილის მფლობელი იტალიური კომპანია ნოემბერში, „გუდვილის“ 10 წლის თავზე, გახდება. რა ოდენობის ინვესტიციის ჩადებას აპირებს „მილან ინვესტმენტი“ ქართულ ბრენდში ჯერჯერობით უცნობია, საწყისი ინვესტიციის ოდენობა კი 4,8 მილიონ ლარს შეადგენს.

როგორც იტალიური კომპანიის ხელმძღვანელი ალესანდრო აზაისი „კომერსანტთან“ საუბრისას აცხადებს, ჩაიდება იმდენი ინვესტიცია, რამდენიც საჭირო იქნება უფრო ძლიერი კომპანიის ჩამოსაყალიბებლად. მისივე თქმით, მათი მიზანია რაც შეიძლება მეტი მომხმარებლის მიზიდვა და კონკურენტულ გარემოში „გუდვილის“ უფრო ძლიერ ბრენდად ჩამოყალიბება. უახლოეს კვირებში ახალი მფლობელები 4-წლიანი სამოქმედო გეგმის შექმნას აპირებენ, რომელშიც უფრო კონკრეტული ნაბიჯების შესახებ იქნება ინფორმაცია.

მანამდე კი ალესანდრო აზაისი აცხადებს, რომ იტალიიდან საქართველოში კონსულტანტები ჩამოვლენ, რომლებიც ადგილობრივ თანამშრომლებს დაატრენინგებენ და რჩევებს მისცემენ.

ახალი მფლობელები „გუდვილის“ გუნდში ცვლილებების შეტანას არ აპირებენ.