საქართველოს ჯანდაცვის მინისტრი დავით სერგეენკო ფარმაცევტული კომპანიების წარმომადგენლებს ხვდება. სერგეენკოს თქმით, დღევანდელი შეხვედრაზე უნდა შეფასდეს თუ როგორ მიმდინარეობს წამლის კანონში შესული ცვლილებების სოციალური დანერგვა.

"უნდა ვეცადოთ ერთად შევაფასოთ განვლილი ერთი კვირა. ვნახოთ რა არის გამოსასწორებელი და გასაუმჯობესებელი. კანონი უნდა შესრულდეს, თუმცა ეს უნდა ხდებოდეს ერთადერთი მოტივაციით – პაციენტისთვის იყოს კონფორტული, უსაფრთხო და ხარისხიანი", - განაცხადა სერგეენკომ.

ფარმაცევტული ასოციაციის ხელმძღვანელის ირინა ჭელიძის თქმით, რეცეპტებთან დაკავშირებით სააფთიაქო სექტორი ყველაფერს აკეთებს, რომ პაციენტები არ იყვნენ უკმაყოფილო. მისი თქმით, უმჯობესი იქნება რიგი წამლები ამ ეტაპზე დროებით მეორე ჯგუფიდან მესამე ჯგუფში, ანუ ურეცეპტოდ გასაცემი წამლების ჯგუფში გადავიდეს.

აღნიშნულთან დაკავშირებით, სერგეენკომ განაცხადა, რომ პირველი სექტემბრიდან ამოქმედდა ახალი რეგულაცია, რომლის მიხედვითაც პირველი და მეორე ჯგუფის წამლები რეცეპტით, ხოლო მესამე ჯგუფის წამლები ურეცეპტოდ გაიცემა.