როგორც ცნობილია, პირველი სექტემბრიდან მედიკამენტების დიდი ნაწილის ყიდვა მხოლოდ რეცეპტით არის შესაძლებელი. სამინისტროს ეს გადაწყვეტილება ბოლო 2 თვის მთავარი მოვლენა გახდა. მოსახლეობა რეცეპტის შემოღებამ ისე შეაშინა, რომ ახალი რეგულაციების ამოქმედებამდე აფთიაქებში მედიკამენტების ყიდვის მსრუველთა რიგი დადგა. მოგვიანებით, კი რიგმა პირველადი ჯანდაცვის ობიექტებში გადაინაცვლა.

მიუხედავად იმისა, რომ რეცეპტის გამოწერა ოჯახის ექიმსაც შეუძლია და სპეციალისტთა ვიზიტი აუცილებელი არ არის, პაციენტების თქმით, ექიმების ნაწილი გამოკვლევის გარეშე წამლის გამოწერისგან თავს იკავებს.

ის, რომ რეცეპტის სისტემის შემოღება მოსახლეობის მიერ ჯანდაცვაზე გაწეული ხარჯის გაზრდას გამოწვევდა, დარგის სპეციალისტები თავიდანვე მიუთითებდნენ. დღესაც, როდესაც სისტემა უკვე ამოქმედდა, ექსპერტები უკვე ამბობენ , რომ „რეცეპტომანია“ ჯანდაცვის ხარჯს, საშუალოდ 10-20%-ით გაზრდის.

"მსოფლიოს თითქმის ყველა ქვეყანაში წამლის შეძენა რეცეპტით ხდება. შესაბამისად, ამ სისტემის საქართველოში ამოქმედება გასაკვირი ნამდვილად არ არის. თუმცა, აქ პრობლემა ისაა, რომ მოსახლეობა სოციალურად გაჭირვებულია და წამლის რეცეპტით გაცემისას გაზრდილი ხარჯი მის ჯიბეზე ცუდად მოქმედებს. აქედან გამომდინარე, შეიძლება ითქვას რომ დღესდღეობით ასეთი ნაბიჯის გადადგმა, ობიექტური რეალობიდან გამომდინარე ნაჩქარევი იყო“,- განაცხადა „ბიზნეს-რეზონანსთან“ საუბრისას ექსპერტმა სამედიცინო საკითხებში კახა ჯაყელმა.

"პაციენტი, რომელმაც იცის, რომ ექიმთან რიგში ჩადგომა და გამოკვლევისათვის დამატებითი ხარჯის გაწევა მოუწევს, შეეცდება იპოვოს გამოსავალი და წამალი „შავ ბაზარზე“ შეიძინოს. ასეთი ფაქტები, დამერწმუნეთ აუცილებლად იქნება“,- განაცხადა წამლის სააგენტოს ყოფილმა ხელმძღვანელმა გიორგი ბარამიძემ.