ძლიერი წვიმის და სეტყვის შედეგად გორის რაიონში მდინარე ტანა ადიდდა და კალაპოტიდან გადმოვიდა, რის გამოც სიფლები ატენი და ხიდისთავი დაიტბორა. ვითარება მთიდან წამსულმა ნიაღვარმა გაართულა და ადგილობრივების გარკვეულ ნაწილს წყალი საცხოვრებელ სახლებსა და სარდაფებში შეუვარდათ. დახოცილია შინაური ფრინველი, დაზიანებულია ხეხილი და ვაზი. აღნიშნულ სოფლებში შიდა ქართლის სამაშველო სამსახურის გამოძახება გახდა საჭირო. მაშველებმა სახლებიდან წყალი ამოტუმბეს. სტიქიის ზონაში ჩავიდა გორის გამგებელი დავით ონიაშვილი, რომელიც ვითარებას ადგილზე გაეცნო. როგორც ის „ნიუპოსტთან“ საუბარში აცხადებს, სტიქიის შედეგებს ხვალ დილიდან სპეციალურად შექმნილი კომისია დაითვლის. გორის რაიონში უამინდობა საღამოს საათებში დაიწყო და ნახევარი საათის განმავლობაში გრძელდებოდა.