საქართველოში სასწავლო წლის დაწყებისთანავე სკოლებში კვების ობიექტების შემოწმება გაგრძელდება. მიუხედავად იმისა, რომ სკოლის ხელმძღვანელები შემოწმების შესახებ ინფორმაციას წინასწარ იღებენ „რეზონანსის“ ინფორმაციით ე.წ. ბუფეტებში მაინც რთული სანიტარული მდგომარეობაა. შეგახსნებთ, რომ სურსათის ეროვნულმა სააგენტომ რამდენიმე სკოლის კვების ობიექტი საერთოდ დახურა.

სააგენტოს ცნობით, სკოლებისა და საბავშვო ბაღების კვების ობიექტების შემოწმება მათი პრიორიტეტია. წლის დასაწყისში რამდენიმე ათეული სკოლა შემოწმდა, უმეტეს ობიექტზე აღმოჩენილია ეტიკეტირებისა და პროდუქტის შენახვის ნორმის დარღვევა. ასევე, სასადილოებში არ არის ცხელი და ცივი წყალი, რაც ჰიგიენური ნორმის დაცვას ართულებს.

ასევე ცნობილია, რომ საჯარო სკოლების შემდეგ, კერძო სკოლების შემოწმებაც დაიწყება.

„სკოლებში მდგომარეობა საკმაოდ მძიმეა - ირღვევა ეტიკეტირების წესები, პროდუქტის შენახვა-რეალიზაციის ნორმა. ცხელი წყლის არარსებობის გამო, ჰიგიენური პირობების დაცვა შეუძლებელია. რამდენიმე სკოლის „ბუფეტი“ საერთოდ დაიკეტა და მათ გარკვეული პერიოდი მიეცათ სარემონტო სამუშაოების ჩასატარებლად“, - აცხადებს „რეზონანსთან“ საუბრისას მომხმარებელთა ფედერაციის ხელმძღვანელი მადონა კოიძე.

საქართველოს მასშტაბით დაახლოებით 2 200 საჯარო სკოლაა, აქედან 218 დედაქალაქში. უკვე შემოწმებული სკოლებიდან, სურსათის ეროვნული სააგენტოს თბილისის სამმართველოს წარმომადგენლებმა, ანტისანიტარიის გამო, ცოტნე დადიანის ქუჩაზე მდებარე 113-ე საჯარო სკოლის „ბუფეტი“ დახურეს და ბიზნესოპერატორი 1 000 ლარით დააჯარიმეს.