კაზანტიპის ფესტივალსა და მისი მიმდინარეობის დროს დაფიქსირებული, გაუხმაურებელი ინციდენტების შესახებ ავჭალის წმინდა ქეთევან წამებულის სახელობის ეკლესიის მოძღვარი, მამა გიორგი რაზმაძე საუბრობს.

მამა გიორგის განცხადებით, კაზანტიპის ფესტივალზე ერთსქესიანთა ქორწინება დაფიქსირდა, ამისთვის კი პასუხისმგებლობა საქართველოს პარლამენტის წევრებმა და პირადად პრემიერმინისტრმა უნდა აიღონ:

„კაზანტიპის ფესტივალზე ნამდვილად არსებობდა ისეთი ფაქტები, რაც განგაშად ღირდა. ამის შესახებ დაზუსტებული ინფორმაციაც გვაქვს. პირველივე დღეს 70 კაცამდე იქნა დაკავებული ნარკოტიკის გამოყენების გამო. ახალგაზრდა ქალმა იქორწინა გოჭზე, ქალმა ქალზე და კაცმა კაცზე, ამ ქორწინებას ოფიციალურად უფორმებდნენ. ანტიდისკრიმინაციული კანონის მიღების დროს ჩვენი პარლამენტარები აცხადებდნენ, ტყუილად გეშინიათ, ქორწინებები არ იქნება და თუ იქნება ჩვენ პარლამენტს ვტოვებთო.

ახლა შევახსენებ ბესელიას, კობახიძეს და სხვებს, სადაა პირობის შესრულება? ეს დუმილი ხომ მათი გამჭვირვალობის ნიშანია? ამ ადამიანებმა ოღონდ ჭამონ, სვან და ფეხებზე ჰკიდიათ სახელმწიფო. პრემიერმინისტრს შეეძლო ერთი სიტყვით მოეგვარებინა ყველაფერი, მაგრამ ყურადაც არ იღო ჩვენი შეგონება. შემირცხვენია ის ქვეყანა სადაც მთავრობა მეძავებით ცდილობს გამდიდრებას“, - აცხადებს მამა გიორგი რაზმაძე.

იგი კაზანტიპის ფესტივალს უკავშრებს დარიალში მომხდარ სტიქიასაც, რის შედეგადაც სამანქანო გზა ჩაიკეტა და რუსეთიდან საქართველოს ტერიტორიაზე შემოსვლა შეუძლებელი იყო, კაზანტიპზე კი შედეგად რუსი ტურისტების ნაკლებობა დაფიქსირდა:

„ის, რაც მოხდა, შემთხვევითი კი არ იყო, კარგად დაუკვირდით, 17-ში და 20-ში ჩამოწვა მთის უზარმაზარი მასა, რომელმაც მთელი დარიალის ხეობა ჩაკეტა. ეს ხალხი ელოდებოდა უამრავ ტურისტს რუსეთიდან, ძირითადი გათვლა სწორედ რუსებზე იყო, ამიტომ, როცა მანქანებით უნდა შემოსულიყვნენ საქართველოში, სწორედ ამ დროს ჩაიკეტა გზა ღვთის განგებით. ესენი ვერ აცნობიერებენ ამ საქციელის სიმძიმეს“, - აცხადებს „ალიასთან“ საუბრისას სასულიერო პირი.