გიორგი თარგამაძე: მივესალმები სატარიფო პოლიტიკის გადახედვის მცდელობას

ბიზნესი & ეკონომიკა - 17:47, 24 Dec, 2012

617

,,ახალი მთავრობის ხელმძღვანელის განცხადებები ელექტროენერგიის ტარიფის კლებასთან დაკავშირებით მიღწეულ გადაწყვეტილებებზე ერთმნიშვნელოვნად მისასალმებელია და პირველ რიგში, ეს მეტყველებს იმაზე, რომ წლების მანძილზე ქრისტიან-დემოკრატების მცდელობა - კომუნალური საგადასახადო ტარიფების შემცირებით შეღავათი მიგვეცა მოსახლეობისთვის და ქართული ბიზნესისთვის, იყო დასაბუთებული და ამის რესურსი არსებობდა. წინა ხელისუფლების პოლიტიკა და დამოკიდებულება ქრისტიან-დემოკრატების წინადადებებისადმი და ზოგადად, ტარიფების თემის ხელშეუხებლობა, იყო დანაშაულებრივი ეკონომიკური საგადასახადო პოლიტიკის ნაწილი, რამაც ძალიან მძიმე დაღი დაასვა ჩვენი ქვეყნის ოჯახებისა თუ ეკონომიკის მდგომარეობას.
პარტია მიესალმება სატარიფო პოლიტიკის გადახედვის მცდელობას ახალი მთავრობის მხრიდან და ელის, რომ ინტენსიური მუშაობა ბუნებრივი აირისა და წყლის გადასახადის მიმართულებითაც გაგრძელდება.

თარგამაძე მიიჩნევს, რომ უნდა გაიაფდეს 300 კილოვატზე მეტის მომხმარებელი საშუალო ფენისთვის, მრავალშვილიანი ოჯახებისთვის და ქართული ბიზნესისთვის.

,,ქართული პროდუქციის სიძვირის ძირითადი განმაპირობებელი საბანკო სესხებთან და სხვა მაკროეკონომიკურ პრობლემებთან ერთად არის სწორედ მაღალი ტარიფები ელექტროენერგიაზე, გაზზე და წყალზე. ამ მხრივ ჩვენი მეზობელი სომხეთის მაგალითი მაინც გავითვალისწინოთ, სადაც ადგილობრივი ეკონომიკის სტიმულირებისა და ამ გზით სამუშაო ადგილების შექმნის ხელშესაწყობად ბიზნესისთვის, იურიდიული პირებისთვის ტარიფების მოცულობა კერძო აბონენტებთან შედარებით საგრძნობლად ნაკლებია. ,,ქრისტიან-დემოკრატები" ერთმნიშვნელოვნად დადებითად აფასებენ პრემიერ-მინისტრისა და მთავრობის გადაწყვეტილებას, თუმცა ეს არის პირველი და სრულიად არასაკმარისი ნაბიჯი იმ საერთო მიზნის განსახორციელებლად, რასაც ქვეყანაში ადეკვატური, დასაბუთებული და ყველასთვის მისაღები ტარიფების შემოღება ჰქვია."- აცხადებს თარგამაძე.

თარგამაძის პარტია მზადყოფნას გამოხატავს, ამ თემებზე მუშაობის დროს მის ხელთ არსებული დასაბუთებული პოზიცია შესაბამის უწყებებს მიაწოდოს.