ზუგდიდში ,,მაკდონალდსისთვის“ ჭყონიას მიწას უფასოდ გადასცემენ?

ზუგდიდში ,,მაკდონალდსისთვის“ ჭყონიას მიწას უფასოდ გადასცემენ? - რას ითხოვენ ზუგდიდლები

საზოგადოება - 14:59, 28 Aug, 2014

4562

ზუგდიდში ,,მაკდონალდსის“ აშენება იგეგმება. თუმცა სწრაფი კვების ობიექტმა აზრთასხვადასხვაობა გამოიწვია ადგილობრივ მოსახლეობაში. რამდენადაც სოციალურ ქსელში გავრცელებული კომენტარებიდან ირკვევა, მიზეზი ადგილმდებარეობაა. ზუგდიდლები გუბერნიის სიახლოვეს მაკდონალდსის მშენებლობას არ იწონებენ. ზოგი მათგანი ფიქრობს, რომ ამისთვის საუკეთესო ადგილი რკინიგზის სადგურია, ხოლო ზოგს თეატრის წინ სურს მაკდონალდსის ხილვა. ზუგდიდლებს არ სურთ ქალაქის იერსახის დამახინჯება. ზუგდიდის მერიაში აცხადებენ, რომ სურთ გადაწყვეტილება ზუგდიდელებთან ერთად მიიღონ. მათი თქმით, კვირის ბოლოს შესაბამისი სამსახურები შეიკრიბებიან და მოხდება ფეისბუქზე გამოთქმული მოსაზრებების შეჯამება-განხილვა.

„მასალას, რომელიც ჩვენს გვერდზე გამოქვეყნდა, აქვს 5 ათასზე მეტი ნახვა, რაც იმაზე მიუთითებს, რომ მოქალაქეების ინტერესი დიდია. ჩვენ გვინდა, რომ ზუგდიდელებმა მეტი იაქტიურონ და გამოხატონ საკუთარი მოსაზრება“, - აცხადებს მერიის პრესსამსახური.

,,ნიუპოსტი“ კომენტარისთვის ზუგდიდის საკრებულოს დაუკავშირდა, როგორც საკრებულოს დეპუტატი ანი წითლიძე აცხადებს, ისინი არ არიან მშენებლობის წინააღმდეგ, თუმცა გუბერნიის მიმდებარე ტერიტორია არც მათთვისაა მისაღები, ,,ააშენონ რამე, მთავარია კაზანტიპივით არ გამოუვიდეთ“, - ამბობს წითლიძე. დეპუტატი ადგიმდებარეობის გარდა, ხელისფულების გარკვეულ ფინანსურ ინტერესებზე საუბრობს.

,,ერთი, რომ "მაკდონალდსი" აუცილებლად უნდა აშენდეს, მაგრამ აშედეს ისეთ ადგილას, რომელიც მიმდებარე ტერიტორიების განვითარებას გამოიწვევს და არა გუბერნიის გვერდით, სადაც ისედაც გადატვირთულია. ის უნდა ჯდებოდეს ზუგდიდის განვითარების გეგმაში და მომავალში მისმა მდებარეობამ ხელი არ უნდა შეუშალოს ქალაქის ურბანულ განვითარებას.

მეორე და მნიშვნელოვანი - ჩემი ინფორმაციით, "მაკდონალდისათვის" მიწა საკუთრებაში უნდა გადაეცეს ეკონომიკის სამინისტროს, რომელიც თავის მხრივ გადასცემს ჭყონიას. გაუგებარია მიწა უფასოდ რატომ უნდა გადასცეს ზუგდიდმა ეკონომიკის სამინისტროს ან ჭყონიას? ნებისმიერმა, ინვესტორმა კეთილი ინებოს და იყიდოს თუ რამის აშენება უნდა. მითუმეტეს ჭყონიამ, რომელსაც არ უჭირს რა ფინანსური გარიგებები აქვს მას გუბერნატორთან? რადგან გუბერნატორის ასეთი დაჟინებული მოთხოვნა საკითხის სასწრაფოდ გადაწყვეტაზე უკვე ეჭვს ბადებს. ჩვენ ინტენსიურად ვმუშაობათ ამ თემაზე, ზუგდიდი პატარა ქალაქია და არც ჩალითაა დაუხურლი, სხვათაშორის.“, - აცხადებს საკრებულოს დეპუტატი ანი წითლიძე.

ზუგდიდის მერიამ სოციალურ ქსელში 25 აგვისტოს გამოაქვეყნა ავსტრიელი არქიტექტორის შლოფერის შემუშავებული „მაკდონალდსის“ მაკეტი, რომლის მშენებლობის ადგილად გუბერნიის მიმდებარე ტერიტორიაა დასახელებული.

სამეგრელო-ზემო სვანეთის გუბერნატორის მოადგილე კობა ქანთარიამ „ლაივპრესთან“ საუბარში აღნიშნა, რომ „მაკდონალდსში“ 130-მდე ადგილობრივი მცხოვრები დასაქმდება. სწრაფი კვების ობიექტის ზუგდიდში გახსნის ინიციატივა სამეგრელო-ზემო სვანეთის გუბერნატორ ლევან შონიას ეკუთვნის.