საქართველოს მთავრობის ადმინისტრაცია ლოგოს შესარჩევად კონკურსს აცხადებს

საზოგადოება - 19:04, 25 Aug, 2014

1781

საქართველოს მთავრობის ადმინისტრაცია, ხვალ, 26 აგვისტოდან ლოგოს შესარჩევად კონკურსს აცხადებს.
როგორ ადმინისტრაციაში განმარტაენ, შინაარსობრივად ლოგო (ან ლოგოს ესკიზი) მთავრობის ადმინისტრაციის საქმიანობის სპეციფიკას უნდა ასახავდეს, უნდა იყოს ადვილად აღქმადი, დასამახსოვრებელი და პოზიტიური.

თავდაპირველად მასალა უნდა იყოს წარმოდგენილი JPEG და PNG ფაილის სახით, დამტკიცების შემთხვევაში კი - ვექტორულ-გრაფიკულ (EPS) და PDF ფორმატში.

კონკურსანტის მიერ წარსადგენი სავალდებულო დოკუმენტაცია: დასკანერებული ხელმოწერილი წერილი, რომელიც ადასტურებს, რომ არის საკუთარი ნამუშევარი, არ მიუბაძავს სხვისთვის ან არ გამოუყენებია წინა დიზაინი, მათ შორის საკუთარიც; ლოგოს JPEG და PNG ფაილები; საკონტაქტო ინფორმაცია.

საკონკურსო დოკუმენტაციის წარდგენის ბოლო ვადაა 2014 წლის 8 სექტემბერი, 18:00 საათი. დაგვიანებით წარდგენილი შეთავაზებები არ განიხილება. კონკურსანტებმა საჭირო დოკუმენტაცია შემდეგ ელექტრონულ მისამართზე - info@geo.gov.ge უნდა გაგზავნონ.

კონკურსის დასრულების შემდეგ, საუკეთესო ლოგოს (ლოგოს ესკიზსს) სპეციალური კომისია გამოავლენს. გამარჯვებულ კონკურსანტთან „სახელმწიფო შესყიდვის შესახებ" საქართველოს კანონით დადგენილი წესის შესაბამისად, ხელშეკრულება გაფორმდება.

ნინა შადური