ცოდვილი ადამიანი თავისი ქმედებით შეიძლება ისე შეიცვალოს, რომ ანგელოზთა სწორი გახდეს

ცოდვილი ადამიანი თავისი ქმედებით შეიძლება ისე შეიცვალოს, რომ ანგელოზთა სწორი გახდეს - ილია მეორე

საზოგადოება - 15:20, 24 Aug, 2014

3859

ჩვენ ყოველდღე ვხედავთ სასწაულს. ამავე დროს ჩვენ არ გვყოფნის ჩვენი გონება, სულიერება და ეს ყველაფერი ჩვენ ჩვეულებრივ მოვლენად მიგვაჩნია, - ამის შესახებ საქართველოს კათალიკოს-პატრიარქმა ილია მეორემ დღეს საკვრიაო ქადაგებისას ბრძანა.

"ძალიან ხშირი შემთხვევაა, როდესაც ადამიანები ამბობენ – სასწაული რომ ეხილათ ირწმუნებდნენ. ადამიანი ურთულესი ბუნებისაა. თავად ადამიანია უდიდესი სასწაული, რომელსაც ვერც ერთი მეცნიერი ვერ ხსნის. ადამიანი არის ის არსება, რომელიც შეიძლება ჩავიდეს ჯოჯოხეთში და ავიდეს ღმერთამდე. შეიძლება ცოდვილი იყოს, მაგრამ თავისი მოქმედებით შეიძლება ისე შეიცვალოს, რომ ანგელოზთა სწორი გახდეს", - აღნიშნა უწმინდესმა და ამის მაგალითად წმინდა დედა მარიამ ეგვიპტელი მოიყვანა. ,,ასეთი მრავალი სხვა წმინდანი არსებობს, რომლებიც ჩავარდნენ ცოდვაში, მაგრამ უფლის წყალობით ისეთ სულიერ სიმაღლეზე ავიდნენ, რომელსაც ჩვეულებრივი ადამიანი ვერ აღწევს“.

უწმინდესმა ხაზი გაუსვა ადამიანური და ღვთიური ენერგიის შეერთებას, რისი ძალითაც ადამიანს სასწაული მიეცემა. პატრიარქმა მრევლს მიმართა, განსაცდელის ჟამს, ხშირად იკითხონ 90-ე და 50-ე ფსალმუნი.

"უფალმა იცის ჩვენ რაც გვჭირდება. ამიტომ დგება კითხვა, თუ კი იცის რატომ "ითხოვეთ და მოგეცეთ თქვენ?" საჭიროა ორივეს სურვილი, განცდა საკუთარ ცოდვათა და არა განკითხვა ძმისა ჩვენისა. ამიტომ ეს სწრაფვა უნდა იყოს ორმხრივი. ამის შესახებ არაერთხელ მითქვამს. ადამიანური და ღვთიური ენერგია უნდა შეერთდეს და გვაძლევს ჩვენ სასწაულებს.. თითქოს ჩვენი ხელი უჭირავს უფალს და მივყავართ სასუფეველში. მადლობა უფალს ამისათვის", - აღნიშნა უწმინდესმა.

ილია მეორემ მოახლებულ ღვთისმშობლის მიძინების დღესასწაულთან დაკავშირებით აღნიშნა, რომ სიონის ღვთისმშობლის მიძინების სახელობის ტაძარში 27 აგვისტოს, 18:00 საათზე ჩატარდება ლოცვა, 28 აგვისტოს, დილის 10:00 საათზე კი წირვა დაიწყება.