ერთიანი ეროვნული გამოცდების საბოლოო შედეგების მიხედვით 35 ათასი აბიტურიენტიდან სტუდენტი 26 ათასზე მეტი გახდა. გრანტი 6 ათასზე მეტ აბიტურიენტზე გაიცა, თუმცა, არ იგულისხმება ე.წ. უფასო ფაკულტეტები, სადაც სტუდენტების სწავლის საფასურს სახელმწიფო სრულად ფარავს.

შარშანდელთან შედარებით წელს სახელმწიფო გრანტი 100 აბიტურიენტით მეტმა მოიპოვა. გამოცდების ეროვნულმა ცენტრმა აბიტურიენტების შედეგები დღეს გამოაქვეყნა.

„წელს სტუდენტი გახდა 26 377 აბიტურიენტი, მონაწილეობას ღებულობდა 35 500-მდე აბიტურიენტი, დაახლოებით 9 ათასია იმ აბიტურიენტების რაოდენობა, რომლებიც გამოეთიშნენ კონკურსს და ვერ მიიღეს ჩარიცხვაში მონაწილეობა, ვერ გადალახეს კომპეტენციის მინიმალური ზღვარი, სახელმწიფო გრანტი 6 ათასზე მეტმა სტუდენტმა მოიპოვა“, - განაცხადა მაია მიმინოშვილმა.