მონიტორინგის შედეგად, მყინვარ დევდორაკზე კვლავ არსებობს სტიქიური პროცესების გააქტიურების რისკი, – ამის შესახებ გარემოს დაცვის სამინისტროს მიერ გავრცელებულ განცხადებაშია ნათქვამი.

სამინისტროს ცნობით, გარემოს ეროვნულ სააგენტოში შეიქმნა სპეციალისტებისგან დაკომპლექტებული საგანგებო ჯგუფი. მათ მოახდინეს დევდორაკის ვიზუალური დათვალიერება. მონიტორინგის შედეგად, მყინვარ დევდორაკზე კვლავ არსებობს სტიქიური პროცესების გააქტიურების რისკი.

"მიღებულ იქნა გადაწყვეტილება, რომ დარიალის ხეობაში დაწესდეს 24-საათიანი მონიტორინგი, რაც მოგვცემს სტიქიის შესახებ ადრეულად გაფრთხილების შესაძლებლობას. გარდა ამისა, მდინარე დევდორაკსა და ამალთეას შესართავთან დამონტაჟდება ავტომატური მეტეოროლოგიური სადგური, რომელიც ავტომატურ რეჟიმში გაზომავს: ნალექის რაოდენობას, ტემპერატურას, ატმოსფერულ წნევას და ინფორმაციას ონლაინ რეჟიმში გარემოს ეროვნული სააგენტოს ცენტრალურ ოფისს მიაწვდის. ასევე, შემუშავდა და დასრულდა ტექნიკური დავალება, იმ თანამედროვე აღჭურვილობის შესყიდვასთან დაკავშირებით, რომელიც უზრუნველყოფს ადრეული გაფრთხილების სისტემის მუშაობას ონლაინ რეჟიმში. გარემოს ეროვნული სააგენტოს მიერ უკვე მიმდინარეობს პროცედურები ევროპის წამყვანი კომპანიებიდან ტექნიკის შესყიდვასთან დაკავშირებით", - ნათქვამია განცხადებაში.

შემთხვევის ადგილზე მაშველები მუშაობას ამ დრომდე განაგრძობენ. უკვე მეორე დღეა ეძებენ დაკარგულს, რომელიც საქართველოს მოქალაქეა. ორიდან ერთი ნაპოვნია, თურქი მოქალაქის ცხედარი წყალმა რუსეთის მხარეს, საზღვართან გამორიყა. გარდაცვლილს, ქართულ მხარეს, რამდენიმე საათში ექსპერტიზისთვის გადასცემენ. გზის აღდგენა კი, სავარაუდოდ, 2 კვირაში დასრულდება.

ნინა შადური