საქართველოს ინფრასტრუქტურის მინისტრის დავით შავლიაშვილის განცხადებით, დარიალის ხეობაში გზის აღდგენას დაახლოებით 2 კვირა დასჭირდება.

„დღეს დილის 06:00 საათზე განახლდა სამუშაოები, ადგილზე მობილიზებულია მთელი ტექნიკა, ამ დროისთვის ტექნიკის დამატება აღარ საჭიროებს. დაახლოებით 600 მეტრი უკვე გაწმენდილია, დაიწყება მასალის შემოტანა და გზის ნიშნულზე მოტანა. აგრეთევე ვაწარმოებთ გამაგრებით სამუშაოებს კილომეტრზე, ძალიან ძნელია იმის თქმა თუ რამდენი ხანი დასჭირდება სამუშაოების დასრულებას, მაგრამ მე ვფიქრობ ამისთვის 2 კვირა მაინც იქნება საჭირო. მინიმუმ 2 კვირა იქნება საჭირო იმისთვის რომ გზა გავხსნათ“,- განაცხადა მინისტრმა.

მისივე თქმით, წინა სტიქიასთან შედარებით მასა ნაკლები, მაგრამ ბევრად აგრესიული იყო.

„დაზიანებითაც საკმაოდ ბევრი ობიექტი დააზიანა და ზარალიც ბევრი იქნება. იმისათვის რომ ეს სიტუაცია ავიცილოთ, ვგეგმავთ, რომ დავიწყოთ გვირაბის პროექტირება, რომელიც ამ პრობლემას მოხსნის. საკმაოდ ძვირადღირებული პროექტი იქნება, მაგრამ ეტაპობრივად ალბათ განვახორციელებთ“,- განაცხადა დავით შავლიაშვილმა.

ნინა შადური