გარემოს დაცვის სამინისტრო განცხადებას ავრცელებს

საზოგადოება - 11:26, 21 Aug, 2014

1840

გარემოსა და ბუნებრივი რესურსების დაცვის სამინისტრო დარიალის ხეობაში მეწყერის ჩამოწოლასთან დაკავშირებით განცხადებას ავრცელებს, რომელსაც "ნიუპოსტი" უცველელად გთავაზობთ:
"2014 წლის 20 აგვისტოს, 22:00 საათზე, დარიალის ხეობაში, მდინარეების თერგისა და ამალი-დევდორაკის შეერთების უბანზე ადგილი ჰქონდა ღვარცოფის გავლას. გარემოსა და ბუნებრივი რესურსების დაცვის სამინისტროს გარემოს ეროვნული სააგენტოს სპეციალიტები ადგილზე მთელი ღამის განმავლობაში მუშაობდნენ.
დღეს, დილის 06:00 საათზე კი, სამინისტროს ჰიდროლოგების, გეოლოგებისა და გლაციოლოგების ჯგუფმა, სასაზღვრო პოლიციის ვერტმფრენით დარიალის ხეობაში მყინვარწვერი, დევდორაკისა და ამალის ხეობები და მიმდებარე უბნები დაათვალიერეს. ჰიდროლოგებმა და გეოლოგებმა სტიქიური პროცესების პირველადი შეფასება გააკეთეს და რისკების განსაზღვრა მიმდინარეობს. დევდორაკის ხეობაში უხვი ატმოსფერული ნალექის შედეგად წინა (17 მაისის) ღვარცოფული მოვლენის დროს დარჩენილი მასის გადმოტანა მოხდა. ადგილზე ღვარცოფის ახალი მოწყვეტის კერები არ ფიქსირდება. გამოტანილი მასის სავარაუდო მოცულობა უახლოეს საათებში გახდება ცნობილი",- აღნიშნულია უწყების მიერ გავრცელებულ განცხადებაში.
დარიალის ხეობაში იმყოფებიან მინისტრთა კაბინეტის წევრები, შინაგან საქმეთა, გარემოსა და ბუნებრივი რესურსების დაცვის, ფინანსთა და რეგიონული განვითარებისა და ინფრასტრუქტურის სამინისტროების სპეციალისტები.
დევდორაკის ხეობაში მთელი ღამის განმავლობაში მიმდინარეობს გადაუდებელი ღონისძიებები. მობილიზებულია შესაბამისი ტექნიკა.

ნინა გოლოშვილი