სტიქიისგან მიყენებულ ზარალს სახელმწიფო სრულად დააფინანსებს

საზოგადოება - 11:14, 21 Aug, 2014

1881

დევდორაკის ხეობაში სამაშველო და გაწმენდითი სამუშაოები დილის 04:00 საათიდან დაიწყო. როგორც ცნობილი ხდება, დამეწყრილ ტერიტორიაზე სტიქიის შედეგების სალიკვიდაციო სამუშაოებს სახელმწიფო სრულად დააფინანსებს.
როგორც ინფრასტრუქტურის სამინისტროში აცხადებებნ, მოეწყო დამცავი დამბა, რომელმაც საავტომობილო გზაზე მდინარე თერგის შემოდინება შეაჩერა.
"უკვე დაწყებულია გზის გაწმენდითი სამუშაოები. მიმდინარეობს მდინარე თერგის კალაპოტის გაღრმავება.

სტიქიის ზონაში სპეციალური ტექნიკის მობილიზება გრძელდება. ამ დროისათვის ადგილზე რამდენიმე ათეული მძიმე ტექნიკა მუშაობს,დღის განმავლობაში რაოდენობა კიდევ უფრო გაიზრდება",- აღნიშნულია უწყების მიერ გავრცელებულ განცხადებაში.

დევდორაკის ხეობაში კვლავ რჩებიან საქართველოს რეგიონული განვითარებისა და ინფრასტრუქტურის მინისტრი, დავით შავლიაშვილი, მისი პირველი მოადგილე გიორგი ამაშუკელი, საქართველოს საავტომობილო გზების დეპარტამენტის თავმჯდომარე, ვაჟა ფანჩულიძე და სხვა კომპეტენტური პირები. მიმდინარე სამუშაოებს ადგილზე მინისტრთა კაბინეტის სხვა წევრებიც აკვირდებიან.

ზარალის ზუსტი ოდენობა დგინდება. დამეწყრილ ტერიტორიაზე სტიქიის შედეგების სალიკვიდაციო სამუშაოებს სახელმწიფო სრულად დააფინანსებს.